បន្ទាប់ពីមានហេតុការណ៍គ្រោះថ្នាក់រហូតដល់បាត់បង់ជីវិតសិស្សចំនួន១១នាក់ក្នុងឧបទ្ទវហេតុលិចទូកនៅខេត្តកណ្ដាល ក្រសួងអប់រំ យុវជន និងកីឡា បានដាក់ចេញនូវវិធានការបង្ការ និងទប់ស្កាត់គ្រោះថ្នាក់ពេលពួកគេធ្វើដំណើរមកកាន់គ្រឹះស្ថានសិក្សា ដោយសង្ឃឹមថា វិធានការនេះនឹងកាត់បន្ថយគ្រោះថ្នាក់ជាអតិបរមា។
វិធានការនេះត្រូវបានក្រសួងអប់រំ យុវជន និងកីឡា ប្រកាសនៅថ្ងៃព្រហស្បត្តិ៍ គឺចំថ្ងៃដែលអ្នកភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល កំពុងប្រារព្ធពិធីបុណ្យប្រាំពីរថ្ងៃរបស់ជនរងគ្រោះដែលស្លាប់ក្នុងឧទ្ទវហេតុលិចទូកកាលពីថ្ងៃទី១៣ ខែតុលា។
ក្នុងសេចក្ដីប្រកាសនោះ គឺក្រសួងអប់រំបានទទួលស្គាល់ថា ជារៀងរាល់ឆ្នាំ សិស្សនិងបុគ្គលិកអប់រំមួយចំនួនបានរងគ្រោះក្នុងអំឡុងពេលធ្វើដំណើរមកកាន់សាលារៀនទាំងមធ្យោបាយធ្វើដំណើរតាមផ្លូវគោកនិងផ្លូវទឹក ជាពិសេសនៅរដូវវស្សា និងអំឡុងពេលទឹកជំនន់។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បាននិយាយក្នុងសេចក្ដីប្រកាសថា គ្រឹះស្ថានសិក្សាភាគច្រើននៅតាមដងទន្លេ នៅជុំវិញបឹងទន្លេសាប និងទីទំនាបផ្សេងទៀត តែងរងនូវការជន់លិច ហើយបានបង្កគ្រោះថ្នាក់ជាយថាហេតុ។
លោកបន្តថា ដើម្បីកាត់បន្ថយផលប៉ះពាល់និងគ្រោះថ្នាក់ដែលអាចកើតមានក្នុងអំឡុងពេលធ្វើដំណើរមកសាលារៀន ក្រសួងអប់រំបានណែនាំដល់ស្ថាប័ននៅក្រោមក្រសួង រួមនឹងអាជ្ញាធរដែនដី និងអាណាព្យាបាល ត្រូវតាមដានរាល់ការព្យាករអាកាសធាតុ ហើយត្រូវពិនិត្យមើលកម្រិតហានិភ័យដែលនឹងអាចកើតមាន ដូចជាស្ថានភាពផ្លូវ ខ្យល់ព្យុះ ជំនន់ទឹកភ្លៀង។
លោកបន្ថែមថា៖ «ត្រូវណែនាំឱ្យកែលម្អដល់ម្ចាស់អាជីវកម្ម និងអ្នកបញ្ជាមធ្យោបាយដឹកជញ្ជូនសិស្ស និង បុគ្គលិកអប់រំឱ្យមានការប្រុងប្រយ័ត្នខ្ពស់ គោរពច្បាប់ចរាចរណ៍ និងមានការទទួលខុសត្រូវខ្ពស់។ ដោយឡែកសម្រាប់ទូក ឬកាណូត ត្រូវបំពាក់ឧបករណ៍សុវត្ថិភាព ឬអាវពោងសុវត្ថិភាព និងកុំដឹកលើសចំណុះ ឬបញ្ជាលើសល្បឿន»។
ជាមួយនឹងគ្នានោះលោក ហង់ជួន ណារ៉ុន បានជំរុញឱ្យគណៈគ្រប់គ្រងគ្រឹះស្ថានសិក្សា អាជ្ញាធរអប់រំ និងអាជ្ញាធរដែនដីចុះត្រួតពិនិត្យមើលទីតាំង លិខិត ឬគោលការណ៍អនុញ្ញាតឱ្យប្រកបអាជីវកម្មលើមធ្យោបាយដឹកជញ្ជូនដែលសិស្សប្រើប្រាស់រួម។ ជាពិសេសលោកគ្រូអ្នកគ្រូត្រូវណែនាំសិស្សជាប់ជាប្រចាំអំពីហានិភ័យដែលនឹងកើតមានឡើងក្នុងអំឡុងពេលធ្វើដំណើរ។
ជាងនេះទៅទៀត គឺណែនាំឱ្យសិស្សចេះគ្រប់គ្រងអារម្មណ៍ គ្រប់គ្រងស្ថានការណ៍ និងវិធីរំដោះខ្លួនចេញពីគ្រោះថ្នាក់ ព្រមទាំងសម្របសម្រួលផ្ដល់ព័ត៌មានរវាងសាលារៀននិងសហគមន៍ជុំវិញការចចូលរួមរាល់សកម្មភាពពាក់ព័ន្ធនឹងការបង្ការទប់ស្កាត់គ្រោះថ្នាក់នានា និងសម្របសម្រួលជាមួយម្ចាស់អាជីវកម្មមធ្យោបាយដឹកជញ្ជូនដើម្បីសម្រួលដល់សិស្ស។
ខ្មែរថាមស៍មិនអាចទាក់ទងឆ្លើយតបពីលោក ហ៊ាង សុធាយុត្តិ អ្នកនាំពាក្យក្រសួងសាធារណការនិងដឹកជញ្ជូនបានទេពីម្សិលមិញ ប៉ុន្តែលោកធ្លាប់ប្រាប់ខ្មែរថាមស៍ពីពេលកន្លងមកថា បញ្ហានេះក្រសួងមិនបានព្រងើយកន្ដើយទេ ហើយមន្ត្រីជំនាញបានធ្វើការងារនេះជាមួយគ្នា បន្ទាប់ពីថ្នាក់មូលដ្ឋានត្រូវរាយការណ៍មកកាន់ថ្នាក់កណ្ដាល។
លោកបានណែនាំម្ចាស់អាជីវកម្មរត់ទូកចម្លងទាំងអស់ថា៖ ត្រូវគោរពតាមបទដ្ឋានដែលដាក់ចេញដោយក្រសួងសាធារណការស្ដីពីការផ្ទុកចំនួនមនុស្ស ត្រូវបំពាក់អាវពោងសម្រាប់ការពារសុវត្ថិភាព និងអ្នកបញ្ជាទូកដធំៗត្រូវស្នើសុំបណ្ណបើកបរពីក្រសួង។
លោកនិយាយថា៖ «ជាទូទៅយើងមើលមិនឃើញថានោះជាបញ្ហាទេ ប៉ុន្តែពេលជួបសោកនាដកម្មនេះ [លិចទូកនៅខេត្តកណ្ដាល] ទើបដឹងថានោះជាបញ្ហា។ ដូច្នេះហើយសូមឱ្យមានការប្រុងប្រយ័ត្នប្រយែងលើករណីនេះទាំងអស់គ្នា»។
លោក ហៀង ហយ ប្រធានភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល បានប្រាប់កាសែតខ្មែរថាមស៍ពីម្សិលមិញថា អាជ្ញាធរមូលរដ្ឋានបានទទួលកិច្ចសហការគ្នាជាមួយនឹងមន្ទីរអប់រំ ដែលបានចុះមកផ្សព្វផ្សាយ និងណែនាំដល់អ្នកធ្វើជីវកម្មទូកចម្លងមិនត្រូវផ្ទុះលើសទម្ងន់ ជាពិសេសត្រូវបំពាក់អាវពោងសុវត្ថិភាពជាដើម។
លោកនិយាយថា៖ «យើងមានប្រជាការពារជួយសម្រួលដល់ការធ្វើដំណើររបស់សិស្សតាមមធ្យោបាយផ្លូវទឹកនិងផ្លូវគោកទាំងការឆ្លងផ្លូវនិងឆ្លងទឹកទៅមក។ ចំណែកលោកគ្រូអ្នកគ្រូ ក៏បានណែនាំដល់អាណាព្យាបាលនិងសិស្សផងដែរអំពីសុវត្ថិភាពផ្ទាល់ខ្លួនពេលធ្វើដំណើរទៅមក»។
លោក គួច ម៉េងលី អ្នកជំនាញដែលឈឺឆ្អាលលើវិស័យអប់រំ បាននិយាយថា វិធានការបង្ការនិងទប់ស្កាត់នេះ គឺបង្ហាញពីការយកចិត្តទុកដាក់ និងការដាស់តឿនរបស់ក្រសួងអប់រំ យុវជន និងកីឡា ទៅលើសុវត្ថិភាពរបស់សិស្សនិងបុគ្គលិកអប់រំ។ ប្រសិនបើមិនមានការដាស់តឿនពីសំណាក់ក្រសួងអប់រំទេ គឺប្រជាជនខ្មែរកាន់តែអាចមានបញ្ហាគ្រោះថ្នាក់ផ្សេងៗ។
យ៉ាងណាលោកជំរុញឱ្យក្រសួងអប់រំចេញសេចក្ដីដាស់តឿនពាក់ព័ន្ធនឹងសុវត្ថិភាពសិស្សឱ្យបានញឹកញាប់ គឺមិនមែនពេលមានបញ្ហារួចហើយទើបចេញសេចក្ដីណែនាំ ឬបង្កើតច្បាប់បង្ការតាមក្រោយនោះទេ។
លោកនិយាយថា៖ «មិនមែនតែគ្រោះថ្នាក់តាមមធ្យោបាយធ្វើដំណើរតាមផ្លូវទឹកទេ សូម្បីតែមធ្យោបាយតាមផ្លូវគោកក៏មានការគ្រោះថ្នាក់ដែរ។ នេះជារឿងមួយដែលខាងក្រសួងអប់រំ យុវជន និងកីឡា ក៏ដូចជាអាណាព្យាបាលសិស្សគួរតែមានការយកចិត្តទុកដាក់ខ្លាំង ដែលកន្លងមកហាក់បីដូចជាមិនសូវមាននរណាខ្វាយខ្វល់ទាល់តែសោះ»។
កាលពីថ្ងៃទី១៣ ខែតុលា ឆ្នាំ២០២២ មានករណីលិចទូកដចម្លងដឹកសិស្សនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល ដែលបណ្តាលឱ្យសិស្សបាត់បង់ជីវិតចំនួន១១នាក់ ដោយសារម្ចាស់ទូកដមិនមានបំពាក់អាវពោងសុវត្ថិភាព និងស្ថានភាពទូកមានលក្ខណៈបច្ចេកទេសមិនត្រឹមត្រូវ ខណៈមន្ត្រីអង្គការសង្គមស៊ីវិលថា បញ្ហានេះ ជាការឆកល្វែងរបស់អាជ្ញាធរដែលត្រូវតែមានការរួមចំណែកទទួលខុសត្រូវ៕