کابل (پژواک، ۱۹ چنګاښ ۱۴۰۰): د ترکیې ولسمشر رجب طیب اردوغان ویلي چې له امریکا سره د کابل هوایي ډګر د امنیت د کاري ساحې پر څرنګوالي موافقې ته رسېدلي دي.
د امریکا غږ د راپور له مخې، ښاغلي اردوغان دغه راز ویلي چې د ترکیې او امریکا د دفاع وزیرانو د تېرې پنجشنبې په ورځ په دې اړه په تفصیل سره ټیلېفوني خبرې هم کړې دي.
ده زیاته کړې: “له ناټو او امریکا سره د کابل هوایي ډګر د ماموریت پر کاري ساحې خبرې وشوې. پر دې مو خبرې وشوې چې موږ څه منو او هغوی څه ومني.”
ترکیي ژمنه کړې وه چې له افغانستانه د بهرنیو ځواکونو تر وتو وروسته به د کابل هوایي ډګر امنیت ساتي، خو د دغه کار لپاره یې د ۱۳۰ میلیونه ډالرو غوښتنه کړې وه.
د ترکیې ولسمشر رجب طیب اردوغان تېره میاشت په بلجیم کې د ناټو سرمشریزې غونډې پر مهال د امریکا له ولسمشر جو بایډن سره هم خبرې کړې وې.
امریکا له دې لیدنې وروسته د حامد کرزي نړیوال هوایي ډګر د امنیت ساتلو لپاره د ترکیې د “ښکاره ژمنې” ستاینه کړې وه.
د کابل نړیوال هوایي ډګر د لوېدیځو هېوادونو د ډيپلوماتانو او خیریه مؤسسو د کارکوونکو لپاره د وتلو مهمه لار ده.
امریکا هم ویلي چې له افغانستانه د ټولو ځواکونو له وتلو وروسته به شاوخوا ۶۰۰ سرتېري په افغانستان کې پرېږدي چې د سفارت، ډیپلوماتانو او کابل هوایي ډګر امنیت وساتي.
Visits: 97
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن