ViuTV｜花姐搶盡新節目《直播王》鏡頭 網民：部電視為花姐而開

人氣男團MIRROR及ERROR經理人花姐之前喺米線連鎖食店微電影廣告以「譚仔姐姐」身份壓軸登場，大講「譚仔話」嘅佢被網民指豪無違和感，亦喺呢個廣告中見到花姐另一面；噚晚（15日）ViuTV新節目《直播王》開播，花姐又再發揮搞笑本質，唔少網民都表示比起一班參賽者，花姐先係主角。

《直播王》係ViuTV首個與直播平台合作並以直播作主題嘅選秀節目，將會一連8個星期日晚上10時半播出，以選出「直播界巨星」。節目由陳俞希（Hailey）及蔡瀚億（BabyJohn）主持，搵嚟張紋嘉（Crystal）、林奕匡（Phil）及黃慧君（花姐）擔任評判。《直播王》嘅模式跟足《全民造星》，評判就認為外表唔係最重要，林奕匡表示最緊要係夠迷人，眼神接觸好重要，喺直播時一定要望鏡頭，而花姐亦指出一定要過份自信先適合之後發展，就好似BabyJohn咁，認為自信係好事嚟。

不過，一班參賽者嘅才藝環節就似乎令節目由選秀節目變成搞笑節目，唔單止有人唱歌走音，仲有以尹光廟街形式唱歌、舞棍，甚至用吹泡泡機自製舞台效果。當花姐見到有參賽者跳舞表現差，一向敢言嘅花姐就講咗句：「死啦，我第時簽女團會唔會都係咁。」花姐亦喺參賽者演唱有關「接吻」嘅歌曲時，落力模仿「派吻」嘅動作，相當爆笑，同平時「脾氣火爆」形象完全唔同。唔少網民都將節目焦點放咗喺花姐身上，分別喺ViuTV FB專頁留言：「部電視為花姐而開」、「好簡單有花姐就like」、「有花姐，有收視」及「花姐I LOVE U」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！