គ្រោះទឹកជំនន់បានបង្កឲ្យមានជាភាពមិនច្បាស់លាស់ចំពោះទស្សនវិស័យសេដ្ឋកិច្ចរបស់ប្រទេសកម្ពុជានៅឆ្នាំនេះ ខណៈដែលប៉ះពាល់ដល់រាប់ពាន់គ្រួសារ និងស្រែចម្ការជាច្រើនផ្សេងទៀត។
ទោះជាយ៉ាងណាក៏ដោយ អ្នកសេដ្ឋកិច្ចបានបង្ហាញជាសុទិដ្ឋិនិយមថា បើទោះបីជាប្រទេសនេះត្រូវបានរងគ្រោះដោយបញ្ហាទឹកជំនន់បន្ថែមពីលើករណីឆ្លងរីករាលដាលនៃជំងឺកូវីដ១៩ និងការដកប្រព័ន្ធអនុគ្រោះពន្ធ EBA ដោយផ្នែកដែលផ្តល់ដោយសហភាពអឺរ៉ុប (EU) ក៏ដោយ ក៏មិនធ្វើឲ្យផលប៉ះពាល់ច្រើនសម្រាប់ប្រទេសជាតិដែរ។
មុនពេលមានមានបញ្ហាទឹកជំនន់ រដ្ឋាភិបាលនិងស្ថាប័នហិរញ្ញវត្ថុអន្តរជាតិនានាមានការព្យាករណ៍ខុសគ្នាទាក់ទងនឹងកំណើនសេដ្ឋកិច្ច។
រដ្ឋាភិបាលបានឲ្យដឹងថាកំណើនសេដ្ឋកិច្ចនឹងធ្លាក់ចុះ ១,៩ ភាគរយ ខណៈពេលដែលស្ថាប័នហិរញ្ញវត្ថុពិភពលោកបានផ្លាស់ប្តូរទស្សនៈរបស់ខ្លួនពីព្រោះប្រទេសកម្ពុជាត្រូវបានមើលឃើញថាមានផលប៉ះពាល់តិចដោយវីរុសកូវី១៩ជាងប្រទេសដទៃទៀតក្នុងតំបន់និងពិភពលោក។
ធនាគារពិភពលោកកាលពីពេលកន្លងទៅ បានព្យាករថាសេដ្ឋកិច្ចរបស់ប្រទេសកម្ពុជានឹងទទួលបានកំណើនអវិជ្ជមាន -២,០ ភាគរយនៅក្នុងឆ្នាំនេះ។
ជាមួយគ្នានេះផងដែរ ធនាគារអភិវឌ្ឍន៍អាស៊ី (ADB) បានកែតម្រូវការព្យាករណ៍ររបស់ខ្លួនអំពីកំណើនសេដ្ឋកិច្ចនៅឆ្នាំ ២០២០ មកត្រឹមចំនួនដក ៤ ភាគរយ ពីការព្យាករកាលពីពេលកន្លងទៅរបស់ខ្លួនចំនួនដក ៥,៤ ភាគរយនៅក្នុងខែមិថុនា ខណៈដែលមូលនិធិរូបិយវត្ថុអន្តរជាតិ (IMF) បានព្យាករថាសេដ្ឋកិច្ចរបស់ប្រទេសកម្ពុជាត្រូវបានព្យាករណ៍ថានឹងធ្លាក់ចុះត្រឹម ២,៨ ភាគរយនៅឆ្នាំនេះ។
លោកស្រី Sunniya Durrani-Jamal ប្រធានស្ថានតំណាងធនាគារអភិវឌ្ឍន៍អាស៊ី (ADB) ប្រចាំកម្ពុជាបានឲ្យដឹងថាយើងមិនអាចធ្វើការប៉ាន់ប្រមាណពីផលប៉ះពាល់សេដ្ឋកិច្ចសរុបដោយសារគ្រោះទឹកជំនន់ភ្លាមៗបាននោះទេ។
ទោះយ៉ាងណា លោកស្រីមាថា ធនាគារអភិវឌ្ឍន៍អាស៊ីនឹងចេញបច្ចុប្បន្នភាពសេដ្ឋកិច្ចនៅខែធ្នូឆ្នាំ ២០២០ ហើយផលប៉ះពាល់នៃទឹកជំនន់នឹងត្រូវបានឆ្លុះបញ្ចាំងនៅក្នុងរបាយការណ៍នេះ។
លោកស្រីបន្តថា៖ «នៅដំណាក់កាលនេះ ការព្រួយបារម្ភដ៏ធំបំផុតគឺទាក់ទងនឹងសុវត្ថិភាពនៃគ្រួសារដែលរងផលប៉ះពាល់ចំនួន ៧ ម៉ឺនគ្រួសារ និងធានាឲ្យបានថាពួកគេមានទីតាំងសម្រាប់ស្នាក់នៅ ខណៈដែលយើងក៏ចង់នៅជាមួយគ្រួសារផ្សេងទៀតដែលរងគ្រោះក្នុងរាជធានីភ្នំពេញនិងខេត្តចំនួន ១៨ ផ្សេងទៀតដែលរងគ្រោះដោយទឹកជំនន់ផងដែរ»។
លោកស្រីបន្ថែមថា រដ្ឋាភិបាលកំពុងតែមានកិច្ចខិតខំប្រឹងប្រែងឲ្យអស់ពីសមត្ថភាពដើម្បីកាត់បន្ថយផលប៉ះពាល់ធ្ងន់ធ្ងរដែលអាចកើតមានដោយផ្តល់អាទិភាពដល់សុវត្ថិភាពរបស់អ្នកដែលរងគ្រោះជាចម្បង។
លោកស្រីថា៖ «ខ្ញុំជឿជាក់ថា ការវាយតម្លៃពីការខូចខាតនឹងត្រូវបានរៀបចំឡើងដោយរដ្ឋាភិបាលដោយមានការគាំទ្រពីដៃគូអភិវឌ្ឍន៍តាមការស្នើសុំ។ បន្ទាប់ពីនោះ ធនាគារអភិវឌ្ឍន៍អាស៊ីអាចជួយដល់ការរៀបចំការប៉ាន់ស្មានតម្លៃសម្រាប់ការកសាងឡើងវិញប្រសិនបើចាំបាច់។ ធនាគារអភិវឌ្ឍន៍អាស៊ីក៏បានបែងចែកធនធានពីគម្រោងដែលមានស្រាប់ដើម្បីជួសជុលជាបន្ទាន់នូវការខូចខាតដោយសារគ្រោះទឹកជំនន់ផងដែរ»។
ជំនួយការជាន់ខ្ពស់នៅ PLATFORM IMPACT លោកវ៉ាន់ ដេវីតបានថ្លែងឲ្យដឹងថាការព្យាករណ៍របស់ធនាគារអភិវឌ្ឍន៍អាស៊ីត្រូវបានរៀបចំមុនពេលមានគ្រោះទឹកជំនន់ ហើយមិនបានបញ្ជាក់ពីចំនួននៃការខូចខាតដែលកើតឡើងដោយសារភ្លៀងធ្លាក់ខ្លាំងដែលបណ្តាលឱ្យមានការខាតបង់ជាទំហំទឹកប្រាក់រាប់រយលានដុល្លារ។
ទោះជាយ៉ាងណា លោកថាកំណើនជាក់ស្តែងសម្រាប់ឆ្នាំ ២០២០ នាពេលបច្ចុប្បន្ននៅតែមិនទាន់មានភាពច្បាស់លាស់ រហូតដល់មានការវាយតម្លៃថ្មី។
លោកថា៖ «បញ្ហាទឹកជំនន់នាពេលបច្ចុប្បន្នពិតជាបានធ្វើឲ្យប៉ះពាល់ជាច្រើនដល់សេដ្ឋកិច្ចក្នុងតំបន់ ប៉ុន្តែចំពោះផលប៉ះពាល់ប៉ុន្មានគិតជាភាគរយនៃកំណើនជាក់ស្តែងឆ្នាំ ២០២០ នៅតែមិនទាន់មានភាពច្បាស់លាសល់រហូតដល់មានការវាយតម្លៃត្រូវបានធ្វើឡើងនាពេលខាងមុខ»។
លោក បណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាបានបញ្ជាក់ឲ្យដឹងថាកម្ពុជាកំពុងប្រឈមនឹងបញ្ហាបីយ៉ាងដែលមានដូចជាការបាត់បង់ ២០ ភាគរយនៃប្រព័ន្ធអនុគ្រោះពន្ធ EBA ករណីវីរុសកូវីដ១៩ និងបញ្ហាទឹកជំនន់។
ទោះជាយ៉ាងណា លោកថាបញ្ហាទឹកជំនន់នឹងមិនផ្លាស់ប្តូរទស្សនវិស័យសេដ្ឋកិច្ចច្រើននោះទេ។ លោកថា៖ «ការព្យាករណ៍កំណើនសេដ្ឋកិច្ចត្រូវបានឆ្លុះបញ្ចាំងតាមរយៈសកម្មភាពពាណិជ្ជកម្ម ការនាំចេញ ការនាំចូល និងលំហូរចូលនៃការវិនិយោគ ខណៈដែលការប៉ះពាល់ពិតប្រាកដគឺបណ្តាលមកពីករណីនៃជំងឺកូវីដ១៩»។
លោកបន្ថែមថា ជាមួយនឹងវិធានការណ៍ទាន់ពេលវេលារបស់រដ្ឋាភិបាលក្នុងការទប់ស្កាត់ ចក្ខុវិស័យមានលក្ខណៈវិជ្ជមាន។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុលោក មាស សុខសេនសាន ថ្លែងថារដ្ឋាភិបាលនឹងកែសម្រួលការព្យាកររបស់ខ្លួននៅចុងឆ្នាំនេះ។
លោកបន្តថាទឹកជំនន់បានបន្ថែមបន្ទុកមួយផ្សេងទៀតសម្រាប់រដ្ឋាភិបាលក្នុងការដោះស្រាយជាបន្ទាន់។ ទោះជាយ៉ាងណា រដ្ឋាភិបាលនៅមិនទាន់ធ្វើការវាយតម្លៃណាមួយទៅលើផលប៉ះពាល់នោះទេ។
លោកថា៖ «រដ្ឋាភិបាលបានបម្រុងទុកកញ្ចប់ថវិកាជាតិជារៀងរាល់ឆ្នាំសម្រាប់ការសង្គ្រោះគ្រោះមហន្តរាយធម្មជាតិដូចជាទឹកជំនន់»។
គួរបញ្ជាក់ឲ្យដឹងផងដែរថា គ្រោះទឹកជំនន់បានបង្កជាផលប៉ះពាល់ដល់ប្រជាជនជិត ៧០,០០០ គ្រួសារ ស្មើរនឹងចំនួន ២៤៥ ៤២៨ នាក់គិត ត្រឹមថ្ងៃច័ន្ទសប្ដាហ៍នេះ។ របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបានបង្ហាញថាទឹកជំនន់បានប៉ះពាល់ដល់ស្រូវចំនួន ២១៣ ២៨៩ ហិកតាក្នុងនោះចំនួន ៣២ ៣៨២ ហិកតាត្រូវបានរងការខូចខាត៕
ប្រែសម្រួលដោយ ភុន ច័ន្ទឧសភា