今次疫情,對每個國家同地區嘅領袖都係一個挑戰,亦都係一磈照妖鏡,或多或少都比個疫情搞到管治醜態盡現。而疫苗嘅出現,無論對管治者或者各地人民,都等如好似隧道裡面終於見到光一樣,為咗逃離管治危機,好自然就會成為黎緊最激烈嘅外交博奕。先不論疫苗係咪可以完全解決疫情,但近日表現得再肉酸嘅,都幾肯定係歐盟。
話說因為歐盟嘅官僚決策缺陷,當日佢地差唔多係最遲簽約落訂嘅西方國家,嗱,如果疫情控制得唔算太差,情況唔太惡劣遲唔緊要嘅,例如澳洲同日本都遲嘅。不過歐盟係咩情況大家都心裡有數,只係無英國咁慘重咁解。Pfizer响歐洲生產,不過產量有限,而且保存運送亦都有限制(-70度)無聲出,總唔能夠問美帝嗰邊寄過黎。依家問題就出現响牛津疫苗生產商AstraZenica嗰度,首先歐盟遲過英國三個月簽約,大家想象下先,疫情爆發到公開研發疫苗幾耐?三個月係遲到癡線嘅事黎嘅。
合約寫明話訂金會攞黎分散投資响英國同歐洲廠房,歐盟係有會有相對嘅優先權,當日係同意㗎。好喇,依家英國兩間廠生產速度同英國政府接種嘅執行能力突然變強,兩日前歐盟總裁就發皮氣,話「先到先得」唔公平,話英國霸住啲貨過份同國民注種。然後尋日就輪到德國,當地衛生部門聲稱牛津疫苗對65以上人士嘅數據唔充足,雖然覺得安全,但質疑有效性,所以唔鼓勵國內65以上人士接種(住),直到廠商提供更多數據為止。好科學理性係咪?錯喇,今日歐盟自己嘅藥物管理機構(MRA)就好似鬼拍後尾枕咁打面,竟然突批准牛津疫苗,話對18歲以上所有人士(包括65歲以上)有效。咁都未夠肉酸,法國總統响歐盟機構批准之後幾個鐘,竟然好似小朋友鬧交咁公開話:「唓,都唔知得唔得嘅。」("doesn't work as expected" and appeared to be "quasi-ineffective" in the over-65s.)。
而更諷刺嘅係英國政府再次賭中法國科研公司Valneva嘅疫苗,宣布研制測試成功(有效率79%),準備大型測試,如無意外四月會响蘇格蘭投產,而英國已經訂咗6千萬支。咁全個歐盟就即時癲咗,响無通知愛爾蘭(會員國黎㗎!)、北愛同英國嘅情況下,今日竟然話考慮限制Pfizer疫苗响愛爾蘭經北愛入境英國。喂,咁即係無啦啦响北愛同愛爾蘭之間有邊界啦,當日邊個話尊重無邊界㗎,又話最憎人違反脫歐協議?
癲咗幾日之後,回力標開始打返後尾枕喇,德國傳媒同政界今日突然轉向,要求歐盟總裁同政府交代點解德國同歐盟比英國同以色列遲咗幾個月,「唔好剩係針對英國或者牛津疫苗,以色列主要用Pfizer啦,點解佢地就黎打咗一半人口(大概5百萬),我地咁慢呀?」。
伸延報導:
《Financial Times》German panel advises against AstraZeneca vaccine for over-65s
《BBC》EU approves AstraZeneca vaccine amid supply row
《BBC》EU vaccine export row: Bloc backtracks on controls for NI
《The Telegraph》Fury at Emmanuel Macron's 'nonsense' claims about Oxford Covid vaccine