ភ្នំពេញៈ ក្រុមហ៊ុននាំចេញផ្លែស្វាយក្នុងស្រុកចំនួន ២ បានអះអាងថា កង្វះទូកុងតឺន័រ និងតម្លៃដឹកជញ្ជូនតាមផ្លូវទឹកហក់ឡើងខ្ពស់នាពេលនេះកំពុងធ្វើឱ្យថ្លៃដើមផលិតកើនខ្ពស់ដែលប្រឈមនឹងលទ្ធភាពប្រកួតប្រជែងនៅទីផ្សារអន្តរជាតិ។
លោក ហេង ស្រេង អ្នកគ្រប់គ្រងទូទៅក្រុមហ៊ុន ផ្លេនធីង អ៊ិនដាសស្ទ្រៀល ឯ.ក បានប្រាប់ ភ្នំពេញ ប៉ុស្តិ៍ថា សកម្មភាពផលិត និងនាំចេញផ្លែស្វាយស្រស់ និងដំណាប់ស្វាយរបស់ក្រុមហ៊ុនលោកដំណើរការយ៉ាងរលូនក្នុងអំឡុងវិបត្តិជំងឺកូវីដ ១៩។
លោកបន្ថែមថា ការនាំចេញផលិតផលស្វាយរបស់ក្រុមហ៊ុនលោកកើនឡើងប្រមាណ ២០ ទៅ ៣០ ភាគរយក្នុងរយៈពេល ២ ខែដើមឆ្នាំនេះធៀបនឹងរយៈពេលដូចគ្នាឆ្នាំមុន។ ទោះយ៉ាងណាការកើនឡើងនៃតម្លៃដឹកជញ្ជូនតាមផ្លូវទឹកនាពេលនេះកំពុងធ្វើឱ្យប៉ះពាល់ដល់ភាពប្រកួតប្រជែងផងដែរ។
លោកថ្លែងថា៖ «សកម្មភាពនាំចេញផលិតផលស្វាយយើងដំណើរល្អធម្មតា តែមានបញ្ហារអាក់រអួលកប៉ាល់ និងកង្វះទូកុងតឺន័រ ហើយតម្លៃដឹកជញ្ជូននៅតែបន្តឡើងតាំងពីមានការឆ្លងជំងឺកូវីដ ១៩។ ការឡើងថ្លៃដឹកជញ្ជូនធ្វើឱ្យថ្លៃដើមផលិតកើនឡើង»។
លោក ហ៊ុន ឡាក់ អគ្គនាយកក្រុមហ៊ុន រីចហ្វាម អេស៊ា ឯ.ក បានព្រួយបារម្ភចំពោះការឡើងថ្លៃដឹកជញ្ជូនតាមផ្លូវទឹកដែលនឹងធ្វើឱ្យក្រុមហ៊ុនពិបាកប្រកួតប្រជែង ខណៈក្រុមហ៊ុនលោកកំពុងត្រៀមខ្លួនសម្រាប់ការនាំចេញផ្លែស្វាយស្រស់ទៅទីផ្សារប្រទេសចិន ជាលើកដំបូងក្នុងពេលឆាប់ៗនេះ។
លោកនិយាយថា៖ «ការនាំចេញស្វាយស្រស់ទៅប្រទេសចិនរបស់ខ្ញុំមិនទាន់ចាប់ផ្តើមទេដោយរង់ចាំការសម្រេចជាចុងក្រោយពីភាគីចិន។ បច្ចុប្បន្នយើងនាំចេញផ្លែស្វាយស្រស់ក្នុងបរិមាណតិចតួចទៅទីផ្សារចិនតាមប្រទេសវៀតណាម»។
លោកបានកត់សម្គាល់ថា ទោះជាយ៉ាងណាការនាំចេញទំនិញក្នុងតំបន់អាស៊ីអាគ្នេយ៍ពុំទាន់ប្រឈមនឹងការកង្វះកុងតឺន័រដូចការនាំចេញទៅអឺរ៉ុបនោះទេ ប៉ុន្តែលោកព្រួយបារម្ភថា និន្នាការនេះនឹងកើតមានឡើងក្នុងតំបន់នេះផងដែរ។
យោងតាមសហព័ន្ធស្រូវអង្ករកម្ពុជា (CRF) កង្វះទូកុងតឺន័រនៅតែជាបញ្ហាចម្បងដែលបាននិងកំពុងរាំងស្ទះដល់ការនាំចេញអង្ករកម្ពុជានារយៈពេល ២ ខែ ដើមឆ្នាំ ២០២១ នេះ។
CRF ឱ្យដឹងទៀតថា កម្ពុជាបានចេញអង្ករ ៧៦ ២២២ តោន ស្មើនឹងតម្លៃ ៦៤,៥៣ លានដុល្លារ ក្នុងអំឡុងពេលនេះធ្លាក់ចុះ ៤៤,១៦ ភាគរយ ធៀបនឹងរយៈពេលដូចគ្នាឆ្នាំ ២០២០។ ការនាំចេញអង្ករថយចុះនេះដោយសារកង្វះទូកុងតឺន័រ និង តម្លៃដឹកជញ្ជូនតាមផ្លូវសមុទ្រនៅបន្តឡើងខ្ពស់រហូតដល់ជិត ៥០០ ភាគរយ នៃតម្លៃដឹកជញ្ជូនកាលពីឆ្នាំ ២០១៩។
យោងតាម លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កម្ពុជាបាននាំចេញផលិតផលកសិកម្មក្រៅពីអង្ករទៅកាន់ទីផ្សារអន្តរជាតិសម្រេចបាន ១ ៥៩៩ ៩២២ តោន កើនឡើង ៥៥,២៧ ភាគរយ បើធៀបនឹងរយៈពេលដូចគ្នាកាលពីឆ្នាំមុនក្នុងនោះផ្លែស្វាយស្រស់មានចំនួន ៤៣ ៦៨០ តោន៕ LA
វីដេអូ៖