ភ្នំពេញៈ ទិវា ១ ម៉ោងសម្រាប់ភពផែនដីនៅថ្ងៃទី ២៧ ខែមីនាគឺនឹងត្រូវធ្វើឡើងក្រោមប្រធានបទ «ផ្តល់ការស្រឡាញ់ដល់ធម្មជាតិ» ដែលក្រសួងបរិស្ថាន និងអង្គការមូលនិធិសកលសម្រាប់អភិរក្សធម្មជាតិ (WWF) នឹងរៀបចំតាមរយៈប្រព័ន្ធឌីជីថលដោយការបញ្ជូនសារតាមរយៈបណ្តាញសង្គមទៅកាន់ពលរដ្ឋទាំងអស់ឱ្យចេះស្រឡាញ់បរិស្ថាន និងចូលរួមការពារផែនដី។
លោក នេត្រ ភក្ត្រា អ្នកនាំពាក្យក្រសួងបរិស្ថានប្រាប់ភ្នំពេញប៉ុស្តិ៍ពីម្សិលមិញថា ការប្រារព្ធទិវា ១ ម៉ោងសម្រាប់ភពផែនដីឆ្នាំ ២០២១ នេះ ក្រសួងបរិស្ថាននឹងធ្វើតាមប្រព័ន្ធឌីជីថលដោយសារមិនអាចធ្វើការជួបជុំគ្នាបានទេ ដោយអនុវត្តទៅតាមវិធានការសុខាភិបាល និងដើម្បីទប់ស្កាត់នូវការឆ្លងនៃវីរុសកូវីដ១៩។
លោកថ្លែងថា៖ «ខ្លឹមសារសំខាន់ដែលយើងផ្តោតទៅលើការប្រារព្ធទិវានេះរបស់ក្រសួងបរិស្ថាន និងអង្គការ WWF នេះដោយបានសហការគ្នាជាមួយនឹងដៃគូផ្សេងៗទៀត ដែលយើងបានជ្រើសរើសយកប្រធានបទ ផ្តល់ការស្រឡាញ់ដល់ធម្មជាតិដែលជាការផ្សារភ្ជាប់ចំណងរវាងសុខភាពធម្មជាតិ និងសុខុមាលភាពរបស់មនុស្សជាតិ»។
អ្នកនាំពាក្យរូបនេះបន្ថែមថា ធម្មជាតិមានសារៈសំខាន់សម្រាប់មនុស្ស សត្វ និងជីវចម្រុះផ្សេងៗដែលការប្រារព្ធទិវា ១ ម៉ោងសម្រាប់ភពផែនដីនេះ គឺដើម្បីឱ្យប្រជាពលរដ្ឋមានការយល់ដឹងឱ្យបានច្បាស់លាស់ពីផលប្រយោជន៍នៃធនធានធម្មជាតិសម្រាប់ជីវិតមនុស្សសត្វ ហើយត្រូវចូលរួមការពារ និងថែរក្សា។
ឆ្នាំនេះ ទិវា ១ ម៉ោងសម្រាប់ភពផែនដីជាការប្រារព្ធលើកទី ១៤ ហើយទិវានេះគឺធ្វើឡើងនៅថ្ងៃទី ២៧ មីនា វេលាម៉ោង ៨:៣០ នាទីយប់តាមប្រព័ន្ធឌីជីថល ដោយបញ្ជូនសារតាមរយៈ Facebook និង Twitter ទៅកាន់សាធារណជនក្នុងប្រទេសកម្ពុជា។
លោក នេត្រ ភក្ត្រា បញ្ជាក់ថា៖ «ទិវា ១ ម៉ោងសម្រាប់ភពផែនដីនេះក៏មិនមែនផ្តោតតែទៅលើធនធានធម្មជាតិទេ ប៉ុន្តែវាក៏មានការពាក់ព័ន្ធទៅនឹងជីវចម្រុះដែលមានសត្វព្រៃផងដែរ ដែលយើងក៏សូមអំពាវនាវទៅដល់ប្រជាពលរដ្ឋកុំឱ្យបរបាញ់សត្វ ដាក់អន្ទាក់ចាប់សត្វ កុំបរិភោគសាច់សត្វព្រៃ ឬប្រើប្រាស់ផលិតផលដែលធ្វើពីស្បែកសត្វ និងការជួញដូរសត្វព្រៃគ្រប់ប្រភេទ ប៉ុន្តែត្រូវចូលរួមការពារ និងថែរក្សាធនធានធម្មជាតិ ព្រៃឈើ និងសត្វព្រៃរបស់យើងវិញ»។
ទិវានេះ ១ ម៉ោងសម្រាប់ភពផែនដី នេះគ្រាន់តែជានិមិត្តរូបនៃការបង្ហាញនូវសេចក្តីស្រឡាញ់ ហើយក្នុងរយៈ ១ ម៉ោងគ្រប់គ្នាអាចបង្ហាញនូវសារៈសំខាន់ៗ ដោយមានទាំងការបិទអគ្គិសនីតាមគ្រួសារនីមួយៗ និងការបង្ហាញនូវក្តីស្រឡាញ់ដល់សត្វព្រៃ ការពារ និងការថែរក្សាផងដែរ។
ទិវា ១ ម៉ោងសម្រាប់ភពផែនដីនេះត្រូវបានប្រារព្ធឡើងតាំងពីឆ្នាំ ២០០៧ ដែលធ្វើឡើងដំបូងគេនៅប្រទេសអូស្ត្រាលីក្នុងទីក្រុងស៊ីដនី ដើម្បីលើកទឹកចិត្តមនុស្សរាប់លាននាក់នៅទូទាំងសកលលោកឱ្យចូលរួមការពារធម្មជាតិ និងភពផែនដីសម្រាប់អ្នកគ្រប់គ្នា។
បើតាមលោក នេត្រ ភក្ត្រា នៅថ្ងៃទី ២៥ ខែមីនា ក្រសួងបរិស្ថានក៏មានការរៀបចំនូវការពិភាក្សាតាមប្រព័ន្ធអនឡាញផងដែរដោយមានការចូលរួមពីស្ថាប័នពាក់ព័ន្ធ អ្នកដែលស្រឡាញ់បរិស្ថាន និងអង្គការ WWF។
លោកមានការជឿជាក់ថា សារដែលពាក់ព័ន្ធជាមួយនឹងទិវា ១ ម៉ោង សម្រាប់ភពផែនដី ដែលក្រសួង និងស្ថាប័នពាក់ព័ន្ធ រួមនឹងអង្គការ WWF បានធ្វើការផ្សព្វផ្សាយលើបណ្តាញសង្គមនោះនឹងមានការជ្រួតជ្រាបទៅដល់ប្រជាពលរដ្ឋក្នុងការចូលរួមចំណែកបង្កើនចំណេះដឹង និងសកម្មភាពក្នុងការទប់ស្កាត់ជំងឺទាំងឡាយ ពិសេសក្នុងបរិបទកូវីដ១៩នេះ៕