संदीप पाठकच्या संकल्पनेतून माजलगावात रक्तदान शिबीर, 100 बाटल्या रक्तसंकलन करण्याचं उद्दिष्ट

मुंबई : गेल्या काही दिवसांपासून कोरोनाचा संसर्ग भारतभर पाहायला मिळतो आहे. अनेक कलाकार आता कोरोनाच्या या लढाईत उतरले आहेत. काहींनी सोशल मीडियाची मदत घेऊन कोरोनासंबंधीच्या बातम्या लोकांना सांगायला सुरुवात केली आहे. मदत इकडून तिकडे पोहोचवायला सुरुवात केली आहे. तर काही कलाकारांनी आपआपल्या परीने खारीचा वाटा उचलायला सुरुवात केली आहे. संदीप पाठक हा त्यापैकी एक. 

संदीप पाठक या कलाकाराला आपण अनेक चित्रपट, नाटकांतून पाहिलं. वऱ्हाड निघालंय लंडनला या नाटकाचे प्रयोग तो करतोच. पण रंगा पतंगा, एक हजाराची नोट अशा अनेक चित्रपटांमधून तो दिसला आहे. म्हणूनच त्याचा असा एक चाहतावर्ग तयार झाला आहे. कोरोनाचं सावट लक्षात घेऊन या काळात असलेली रक्ताची गरज समजून संदीपने सोमवारी रक्तदान केलं. त्यासंबंधी त्याने एक पोस्ट करुन ती सोशल मीडियावर टाकली. आपण रक्तदान करतो आहोतच. पण लोकांनीही रक्तदानासाठी पुढे यावं असं आवाहन त्याने केलं. पण इतकं करुन तो थांबला नाही. 

रक्तदानाचा हा संकल्प त्याने आपल्या गावी म्हणजे बीड जिल्ह्यातल्या माजलगाव या तालुक्यात करायचं ठरवलं आहे. संदीप सध्या मुंबईत आहे. पण माजलगावात त्याचा मोठा मित्र परिवार आहे. माजलगावात काही नड असेल किंवा कुणाला कशाची गरज असेल तर जीव माजलगांव आणि लव माजलगांव असे दोन तरुणाईचे ग्रुप आहेत. ही मुलं तालुक्यासाठी सकारात्मक काम करत असतात. संदीपने रक्तदान केल्याचे फोटो, व्हिडीओ तिथल्या ग्रुपवर टाकले आणि या तालुक्यात 100 बाटल्या रक्त संकलन करण्याचा संकल्प माजलगावकरांना बोलून दाखवला. 

संदीपची ही योजना तिथल्या तरुणाईला आवडली. जीव माजलगाव आणि लव माजलगांव असे ग्रुप या कामाला लागले आहेत. याबद्दल बोलताना संदीप म्हणाला, "माजलगाव हा तालुका जरी असला तरी तिथे रक्तपेढी नाही. प्लाझ्मा वगैरे तर लांबची बात. शिवाय, व्हेंटिलेटरची सुविधा नाही. ऑक्सिजनची सुविधा नाही. रक्तदान शिबीर जरी घेतलं तरी बीडहून रक्तसंकलनालाठी डॉक्टरांची टीम येते. सर्व बाटल्या घेऊन ती गाडी बीडला जाते. तिथल्या रक्तपेढीत ते ठेवलं जातं आणि तिथून आवश्यक ठिकाणी त्याचा पुरवठा होतो. मी रक्तदान केलं आहेच. पण रक्ताची खूप गरज आहे सध्या. यातून ही संकल्पना उदयाला आली. या योजनेला प्रतिसादही चांगला आहे. 30 एप्रिलला माजलगावात हे शिबीर होत आहे. 100 बाटल्यांचं आमचं उद्दिष्ट आहे. सध्या 80 दाते तयार झाले आहेत. सध्याच्या परिस्थितीवर मात करण्यासाठी आपल्याला एकत्रित पाऊल उचलायला हवं. माजलगावातल्या लोकांनी याला सकारात्मक प्रतिसाद दिला आहे. माजलगांवच्या मां वैष्णवी मंगल कार्यालय इथे हे रक्तदान शिबीर होणार आहे."

संदीपच्या या योजनेला मिळणारा प्रतिसाद पाहता किमान सव्वाशे ते दीडशे बाटल्या रक्त संकलित व्हावं अशी अपेक्षा आहे. केवळ माजलगावच नव्हे, तर परळी, आंबेजोगाई अशा छोट्या छोट्या ठिकाणीही अशी शिबीरं व्हावीत आणि त्यातून रक्तसंकलन व्हावं अशी अपेक्षा संदीपची आहे. आपण रक्तदान करतानाच परिस्थितीचं गांभीर्य ओळखून आपल्यासह इतरांनाही या मोहिमेत सहभागी करुन घेण्याचा संदीपचा प्रयत्न खरोखरीच कौतुकास्पद म्हणावा लागेल.