其實今日最值得講嘅英國新聞應該係呢一單，上訴庭推翻39個十幾廿年前被判詐騙嘅老人家嘅裁決。當年呢件案令至少700個受害者除咗罰錢或者坐監之外，當中好多人身敗名裂，妻離子散、破產甚至自殺，原因就係官僚同制度。佢地堅持咗十幾廿年，面對高牆响死之前成功平反。
相信大家都知英國郵政處係私營半獨立機構，而國內係有好多類似香港便利店咁嘅外判郵政局。事源係响2000年前後，英國郵政處更新由Fujitsu開發嘅電腦系統，咁嗰啲外判郵政局就自然要跟隨。不過無幾耐之後就有部份外判郵政局老闆同員工（Sub-Postmaster）發現呢個系統好多bug，會令條數亂晒或者有啲錢唔見咗。當時郵政處只係叫Fujitsu更新，不過堅持話系統無嘢，實情係無解決過條數亂嘅問題。就係因為short數，郵政處發現啲數有問題就報警話有七百幾個Postmaster穿櫃筒落格。
大家緊係覺得英國係法治社會，系統有問題當然會係辯護理由。錯喇，就算英國咁先進嘅民主社會，官僚同制度為咗自保係可以好賤格嘅。當時郵政處向法庭提供嘅証據係堅持整個系統無問題，就係咁，呢七百幾個被告前前後後被判罰錢或者坐監。雖然坐監或者罰款都唔係好重，但係全部都無晒退休金。背負住詐騙呢個罪名，大家都想象到之後嘅人生會點，離婚、破產、失業、自殺乜都有。
當年上訴因為無證據唔受理，投訴亦都唔知可以揾邊個，只係呢三十幾個受害人堅持揾證據向議員求助。最後差唔多用咗十年時間以民事訊訟方式向郵政處要求賠償，直到2016年新郵政總監上台，即時願意和解，响2019年賠咗5千幾萬鎊比其中五百幾個受害人。要留意係和解，郵政處法律上仍然係無錯嘅，而政府只係成立獨立調查檢討（無追究責任）。雖然表面上賠咗好多錢，但係講緊十幾廿年，呢班老人家繼續有案底，英國老人最重要嘅退休金無晒，好多已經過咗身。
而今日嘅判決就係明確指出當日嘅郵政處嘅證據係有隱瞞，所以當日嘅裁決無效，終於還呢39個老人家清白，而呢個案例就可以幫到其他幾百個，下一個公義就係追究當日邊呃法庭。睇到新聞成班老人家同屋企人感動到喊晒，真係感受到面對「高牆」要爭取公義要幾多堅持同痛苦，講緊英國都尚且如此...
報導：
