ក្រសួងសុខាភិបាល ជំរុញដល់មន្ទីរ និងស្ថាប័នពាក់ព័ន្ធទាំងអស់ ត្រូវយកចិត្តទុកដាក់ដល់ដំណើរការរបស់ក្រុមទ្រទ្រង់សុខភាពភូមិ នៅតាមមូលដ្ឋាន ដើម្បីលើកកម្ពស់សុខភាពក្នុងភូមិ បង្ការ និងព្យាបាលជំងឺប្រជាពលរដ្ឋនៅតាមមូលដ្ឋានប្រកបដោយគុណភាព និងប្រសិទ្ធភាព។
ក្នុងសិក្ខាសាលាព្រាងគោលនយោបាយស្តីពី ការចូលរួមរបស់សហគមន៍ ដើម្បីសុខភាព កាលពីថ្ងៃពុធ លោកស្រី វេជ្ជបណ្ឌិត យក់ សម្បត្តិ រដ្ឋលេខាធិការ និងជានាយកគម្រោងមូលនិធិសាកលនៃក្រសួងសុខាភិបាល បានលើកឡើងថា សុខភាពរបស់ប្រជាជននៅតាមសហគមន៍ គឺជាចំណុចសំខាន់ ដែលអាជ្ញាធរមូលដ្ឋាន និងមន្ទីរសុខាភិបាល រាជធានី ខេត្ត ត្រូវយកចិត្តទុកដាក់ខ្ពស់ ដើម្បីធានានូវសុខមាលភាព និងការអភិវឌ្ឍក្នុងសហគមន៍ ជាពិសេស កាត់បន្ថយភាពក្រីក្រ។
វេជ្ជបណ្ឌិតបន្ថែមថា រដ្ឋាភិបាល ក៏ដូចក្រសួង បានបន្តកែលម្អលើការផ្តល់សេវាសាធារណៈ ដោយមានការទទួលខុសត្រូវខ្ពស់លើសុខភាពបុគ្គល សហគមន៍ និងការគ្រប់គ្រងសេវាសុខភាពឱ្យកាន់តែកៀកទៅនឹងប្រជាពលរដ្ឋតាមរយៈវិមជ្ឈការ និងវិសហមជ្ឈការ។
រដ្ឋលេខាធិការខាងលើបន្តថា ចំពោះកំណែទម្រង់តាមរយៈវិមជ្ឈការ និងវិសហមជ្ឈការ ឬកំណែទម្រង់ការអភិវឌ្ឍបែបប្រជាធិបតេយ្យនៅថ្នាក់ក្រោមជាតិ គឺជាកំណែទម្រង់អភិបាលកិច្ចដ៏សំខាន់របស់រដ្ឋាភិបាល ដែលបានកំណត់នៅក្នុងយុទ្ធសាស្ត្រចតុកោណ និងក្នុងកម្មវិធីជាតិស្តីពី ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ ឆ្នាំ២០២១។
លោកស្រីនិយាយថា កំណែទម្រង់វិមជ្ឈការ និង
វិសហមជ្ឈការ បាននាំឱ្យមានការផ្លាស់ប្តូរយ៉ាងសំខាន់នៅក្នុងរចនាសម្ពន្ធ និងអភិបាលកិច្ចនៃប្រព័ន្ធសុខាភិបាលនៅកម្ពុជា ដែលតម្រូវឱ្យធ្វើបច្ចុប្បន្នភាពពីគោលនយោបាយស្តីពី ការចូលរួមពីសហគមន៍ ដើម្បីអភិវឌ្ឍមណ្ឌលសុខភាពដែលមានស្រាប់ឱ្យឆ្លុះបញ្ចាំងនូវបរិបទនៃការអភិវឌ្ឍ និងគោលនយោបាយថ្មីៗ។
លោកស្រី យក់ សម្បត្តិ បន្ថែមថា ក្រសួងសុខាភិបាល នៅតែចាត់ទុកការចូលរួមរបស់សហគមន៍ គឺជាអាទិភាពសំខាន់ក្នុងផែនការយុទ្ធសាស្ត្រសុខាភិបាលទី៤ ដើម្បីធានាអភិបាលកិច្ចល្អ។ គណៈកម្មាការគ្រប់គ្រងមណ្ឌលសុខភាព គឺជាយន្តការសំខាន់ដើម្បីតភ្ជាប់មណ្ឌលសុខភាពជាមួយអជ្ញាធរ និងសហគមន៍ សម្រាប់គ្រប់គ្រង និងថែទាំសុខភាពប្រជាជនក្នុងតំបន់នីមួយៗ។
លោកស្រីបញ្ជាក់ថា កន្លងមក ក្រសួងសុខាភិបាល យកចិត្តទុកដាក់ពង្រឹងដំណើរការរបស់គណៈកម្មាធិការគ្រប់គ្រងមណ្ឌលសុខភាព ដោយដាក់ជាលក្ខខណ្ឌសំខាន់មួយក្នុងការវាយតម្លៃគុណភាពសេវាសុខាភិបាល។ ដំណើរការរបស់គណៈកម្មាធិការគ្រប់គ្រងមណ្ឌលសុខភាព គឺជាសូចនាការសំខាន់មួយនៅក្នុងចំណោមសូចនាករសុខាភិបាល ដែលបានខិតខំប្រឹងប្រែងឱ្យសម្រេចបានដោយមានការចូលរួមពីដៃគូ និងសង្គមស៊ីវិលនានា។
មន្ត្រីជាន់ខ្ពស់ក្រសួងខាងលើនិយាយថា៖ «សម្រាប់ក្រុមទ្រទ្រង់សុខភាពភូមិ បានដើរតួរសំខាន់ក្នុងការលើកកម្ពស់សុខភាពក្នុងភូមិ បង្ការ និងព្យាបាលជំងឺផ្សេងៗ ជាពិសេស ជំងឺរបេង អេដស៍ គ្រុនចាញ់ និងបញ្ហាសុខភាពដ៏ទៃទៀតដូចជា កាលនៅក្នុងបរិបទកូវីដ-១៩ គឺក្រុមទ្រទ្រង់សុខភាពភូមិ បានបំពេញតួនាទីយ៉ាងសំខាន់ជាមួយអាជ្ញាធរ ដើម្បីអប់រំ និងទប់ស្កាត់ការរាតត្បាតនៃជំងឺកូវីដ-១៩ ព្រមទាំងមានការចាក់វ៉ាក់សាំងកូវីដ-១៩ ផងដែរ»។
វេជ្ជបណ្ឌិតបញ្ជាក់ថា៖ «សូមយកចិត្តទុកដាក់ជំរុញដំណើរការក្រុមទ្រទ្រង់សុខភាពភូមិ ដែលសព្វថ្ងៃនេះ បានដើរតួនាទីយ៉ាងសកម្មក្នុងការជួយអប់រំ ផ្សព្វផ្សាយ និងជំរុញឱ្យប្រជាជនមកទទួលសេវា ព្រមទាំងបានសម្របសម្រួសសកម្មភាពសុខភាពផ្សេងៗនៅក្នុងសហគមន៍ »។
គួររម្លឹកថា ក្រុមទ្រទ្រង់សុខភាពភូមិ គឺជាក្រុមគ្រូពេទ្យសកម្មក្នុងការចុះអប់រំ និងផ្សព្វផ្សាយពាក់ព័ន្ធនឹងមេរោគឆ្លងនានានៅតាមមូលដ្ឋាន ដើម្បីលុបបំបាត់មេរោឆ្លងដូចជា របេង អេដស៍ និងជំងឺគ្រុនចាញ់ នៅឆ្នាំ២០២៥៕