001
(မဇ္စျိမ) ။ ။ အင်တာနက်ပေါ်တွင် မဖွယ်မရာတင်ခြင်း၊ နိုင်ငံရေးအရ တိုက်ခိုက်ပြောဆိုခြင်းများကို နည်းပညာကျွမ်းကျင်သော ပညာရှင်များပါဝင်သည့် အဖွဲ့ဖွဲ့စည်းကာ၂၄ နာရီလုံးစောင့်ကြည့်ပြီး အရေးယူနိုင်ရေး စစ်ကောင်စီက ဆောင်ရွက်နေကြောင်း ဇန်နဝါရီလ ၁၂ ရက်နေ့ထုတ် မြန်မာနိုင်ငံပြန်တမ်းအရ သိရသည်။
အင်တာနက်ပေါ်တွင် သတင်းတု၊ သတင်းမှားများတင်ခြင်း၊ မဖွယ်မရာများတင်ခြင်း၊ နိုင်ငံရေးအရတိုက်ခိုက်ပြောဆိုခြင်းများအပေါ် ဥပဒေကြောင်းအရ တားမြစ်အရေးယူဆောင်ရွက်နိုင်ရေး ခေါင်းစဥ်ဖြင့် ကော်မတီတရပ်ကို စစ်ကောင်စီက ပြီးခဲ့သည့် ဒီဇင်ဘာလလယ်က ဖွဲ့စည်းခဲ့ပြီး ထိုသို့ဆောင်ရွက်ရန် တာဝန်ပေးထားခြင်းဖြစ်ကြောင်း သိရသည်။
အဆိုပါ ကော်မတီတွင် ပြည်ထဲရေးဝန်ကြီးဌာန ဒုတိယဝန်ကြီးက ဉက္ကဌအဖြစ် ဦးဆောင်ပြီး အထူးစုံစမ်းစစ်ဆေးရေးဦးစီးဌာန ဒုညွှန်ချုပ်၊ ရဲတပ်ဖွဲ့ ဒုတိယရဲချုပ် (၂)၊ ဗဟိုဘဏ် ညွှန်ချုပ်တို့အပါအဝင် စုစုပေါင်း လူပုဂ္ဂိုလ် ၁၁ ဦးပါဝင်သည်ကို တွေ့ရသည်။
ထိုသို့ ပိုစ့်တင်ခြင်း၊ ထုတ်လွှင့်ခြင်း၊ မျှဝေခြင်း၊ အားပေးအားမြှောက်ပြုခြင်းများအပေါ် နည်းပညာအရ ရှာဖွေဖော်ထုတ်ပြီး တားမြစ်ရန်၊ ကျူးလွန်သူများအား တည်ဆဲဉပဒေများနှင့်အညီ ထိရောက်စွာ အရေးယူနိုင်ရေး ဆောင်ရွက်ရန် ကော်မတီ၏ လုပ်ငန်းတာဝန်အဖြစ် သတ်မှတ်ထားကြောင်း သိရသည်။
အင်တာနက်ပေါ်ရှိ သတင်းများနှင့် ပတ်သက်ပြီး စစ်ကောင်စီဘက်က အဖွဲ့ဖွဲ့စည်းကာ တန်ပြန်ဆောင်ရွက်ရန်လည်း စီစဉ်ထားကြောင်း သိရသည်။
ကော်မတီ၏ တာဝန်တွင် “ကျူးလွန်သူများ အသုံးပြုလျက်ရှိသော တယ်လီဖုန်းနံပါတ်များ ပိတ်သိမ်းနိုင်ရေး၊ ငွေရေးကြေးရေး ကိစ္စရပ်များအတွက် ၎င်းတို့ အသုံးပြုလျက်ရှိသော ဘဏ်အကောင့်များ၏ အချက်အလက်များ၊ ငွေသွင်းငွေထုတ်မှတ်တမ်းများရယူခြင်းနှင့် ဘဏ်အကောင့်များ ယာယီတားဆီးခြင်းပြုလုပ်နိုင်ရေး ပို့၊ ဆက်ဝန်ကြီးဌာန ၊ ဗဟိုဘဏ်အပါအဝင် သက်ဆိုင်ရာအဖွဲ့အစည်းများနှင့် ညှိနှိုင်းဆောင်ရွက်သွားရန်” ဟုလည်း ပါရှိသည်။
ထို့ပြင် ကော်မတီအနေဖြင့် အဆိုပါ ကျူးလွန်မှုများအပေါ် သက်ဆိုင်ရာ ဌာန ၊ အဖွဲ့အစည်းများက တားမြစ်ပေးရန် ကန့်ကွက်စာ ၊ အကြောင်းကြားစာပေးပို့ခြင်း၊ကျူးလွန်သူများကို သက်ဆိုင်ရာ ဌာန ၊ အဖွဲ့အစည်းများက တရားစွဲဆို အရေးယူရန် အကြောင်းကြားခြင်းများကိုလည်း ပြုလုပ်သွားမည်ဖြစ်ကြောင်း သိရသည်။
ပြီးခဲ့သည့် ဇန်နဝါရီလ ၁၃ ရက်နေ့ကလည်း စစ်ကောင်စီလက်အောက်ခံ ပြန်ကြားရေးဝန်ကြီးဌာနက ညစ်ညမ်းသည့် အပြောအဆို ၊ အပြုအမူများပါဝင်သည့် ရိုက်ကူးထုတ်လွှင့် ဖော်ပြမှုများနှင့် ပတ်သက်ပြီး ထုတ်လုပ်သူ၊ စီစဉ်ရိုက်ကူးသူ၊ သရုပ်ဆောင်သူများကို အရေးယူသွားမည်ဖြစ်ကြောင်း ကြေညာထားသည်။
အာဏာသိမ်းပြီးနောက် လူမှုကွန်ရက်စာမျက်နှာများတွင် စစ်ကောင်စီအား ဝေဖန်ဆန့်ကျင်ရေးသားသူများ နေ့စဉ်နှင့်အမျှ ဖမ်းဆီးခံနေရသည်ကို စစ်ကောင်စီ ဝါဒဖြန့် နေ့စဉ်ထုတ်သတင်းစာများတွင် တွေ့ရပြီး အာဏာသိမ်းကာလ သုံးနှစ်နီးပါးအတွင်း သတင်းဌာန ၁၀ ခုကျော်နှင့် စာပေတိုက်နှင့် ပုံနှိပ်တိုက် ငါးခုထက်မနည်းလည်း လိုင်စင်ပိတ်သိမ်းခံထားရသည်။
