ភ្នំពេញ៖ ក្រសួងបរិស្ថាន និងភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) នៅថ្ងៃនេះ បានប្រកាសជាផ្លូវការចាប់ផ្តើមអនុវត្តគម្រោងព្រៃឡង់បៃតង ដែលមានទឹកប្រាក់ជាង២១លានដុល្លារ សម្រាប់ការអភិរក្សធនធានធម្មជាតិ និងដោះស្រាយបញ្ហាប្រឈមដែលកើតមាននៅតំបន់ព្រៃឡង់ រួមនិងលើកកម្ពស់ជីវភាពសហគមន៍ប្រកបដោយចិរភាព។
ក្នុងពិធីប្រកាសចាប់ផ្តើមគម្រោង USAID ព្រៃឡង់បៃតង នៅរាជធានីភ្នំពេញ លោក សៅ សុភាព រដ្ឋលេខាធិការក្រសួងបរិស្ថាន បានថ្លែងថា គម្រោងដែលមានរយៈពេល៥ឆ្នាំនេះ គិតចាប់ពីខែសីហា ឆ្នាំ២០១៨ដល់ឆ្នាំ២០២៣នេះ នឹងផ្តោតសំខាន់ទៅលើការដោះស្រាយបញ្ហាសំខាន់ពាក់ព័ន្ធនឹងអភិបាលកិច្ច ឬការគ្រប់គ្រងតំបន់ការពារធម្មជាតិ និងតំបន់ទេសភាពនៅតំបន់ព្រៃឡង់ដែលក្របដណ្តប់ក្នុងខេត្តស្ទឹងត្រែង ព្រះវិហារ ក្រចេះ និងកំពង់ធំ។
លោកថា៖ «ការងារធំ គឺពង្រឹងការការពារ និងអភិរក្ស តាមរយៈការពង្រឹងការងារល្បាតរបស់មន្ត្រីឧទ្យានុរក្ស ការងារអនុវត្តច្បាប់ពាក់ព័ន្ធនឹងការបង្ក្រាបបទល្មើស ក៏ដូចជាការងារកសាងសមត្ថកិច្ចភាពរបស់មន្ត្រីជំនាញពាក់ព័ន្ធទាំងអស់នៅក្នុងខេត្តទាំងបួនហ្នឹង»។
លោកសៅ សុភាព បន្តថា គម្រោងនេះក៏នឹងគិតគូរពីការលើកម្ពស់ជីវភាពសហគមន៍ឲ្យមានភាពល្អប្រសើរ ពង្រឹងសមត្ថភាពសហគមន៍ក្នុងការចូលរួមការពារនិងអភិរក្សធនធានធម្មជាតិ កសាងហេដ្ឋារចនាសម្ព័ន្ធនិងបំពាក់នូវសម្ភារៈមួយចំនួនដែលខ្វះខាតក្នុងការអភិរក្ស និងជួយរៀបចំផែនការសកម្មភាពគ្រប់គ្រងតំបន់ព្រៃឡង់និងតំបន់ការពារធម្មជាតិមួយចំនួនទៀតដែលក្បែរនឹងព្រៃឡង់ផងដែរ។
លោកថា៖ «ហើយអ្វីដែលជាមហិច្ឆតាមួយទៀតក្នុងការអនុវត្តគម្រោងនេះ គឺយើងចង់សាកល្បងអនុវត្តការចុះបញ្ជីដីរដ្ឋនៅដែនជម្រកសត្វព្រៃព្រៃឡង់ ហើយអាចចុះបញ្ជីដីរដ្ឋនៅតំបន់ការពារធម្មជាតិនៅជុំវិញតំបន់ព្រៃឡង់នេះដែរ»។
លោកសៅ សុភាព រំពឹងថា តាមរយៈការអនុវត្តគម្រោងនេះ ក៏នឹងបន្តជួយកាត់បន្ថយបទល្មើសព្រៃឈើ សត្វព្រៃ និងការរុករានដីតំបន់ការពារធ្វើជាកម្មសិទ្ធិពីសំណាក់ជនខិលខូច ឲ្យកាន់តែមានប្រសិទ្ធិភាពផងដែរ ខណៈដែលរាជរដ្ឋាភិបាលបច្ចុប្បន្ន បាននិងកំពុងខិតខំទប់ស្កាត់បទល្មើសទាំងនោះ។
លោកស្រី Veena Reddy នាយិកាបេសកកម្មនៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិប្រចាំនៅកម្ពុជា បានថ្លែងកោតសរសើរចំពោះរាជរដ្ឋាភិបាលកម្ពុជា ដែលបានប្តេជ្ញាចិត្តចំពោះការកាត់បន្ថយបទល្មើសព្រៃឈើនិងសត្វព្រៃ និងការទន្រ្ទានដីខុសច្បាប់។
លោកស្រីបន្តថា គម្រោងUSAID ព្រៃឡង់់់បៃតងនេះ នឹងជួយផ្តល់នូវដំណោះស្រាយមួយចំនួនរបស់សហគមន៍នៅក្នុងនិងជុំវិញតំបន់ព្រៃឡង់ ដែលត្រូវការឱកាសសេដ្ឋកិច្ចប្រកបដោយចីរភាព និងពង្រឹងសមត្ថភាពបន្ថែមសម្រាប់ការពង្រឹងការអនុវត្តច្បាប់ក្នុងតំបន់ការពារ រាប់ទាំងការកំណត់ព្រំដែនឲ្យបានច្បាស់ និងការបង្កើនធនធានសម្រាប់សហគមន៍និងក្រសួងបរិស្ថានក្នុងការល្បាត។
លោកស្រីថា៖ «ខ្ញុំមានជំនឿថា បើយើងរួមគ្នា យើងអាចថែរក្សាមូលដ្ឋានធនធានធម្មជាតិដ៏វិសេសវិសាលរបស់កម្ពុជា ដែលកំពុងរងការគំរាមកំហែងនេះបាន និងជួយកែលម្អជីវភាពរបស់មនុស្សជំនាន់ក្រោយឲ្យរឹតតែប្រសើរឡើង»។
តំណាងបណ្តាញសហគមន៍ព្រៃឡង់ខេត្តកំពង់ធំ លោកហឿន សុភាព បានកត់សម្គាល់ថា បទល្មើសធនធានធម្មជាតិនៅតំបន់ព្រៃឡង់ ហាក់មិនមានការថមថយឡើយ បើទោះជាមានកិច្ចខិតខំប្រឹងប្រែងរបស់ក្រសួងបរិស្ថានក្នុងការការពារ និងទប់ស្កាត់ក៏ដោយ។
តែយ៉ាងណា លោករំពឹងថា ការអនុវត្តគម្រោងព្រៃឡង់បៃតង និងគម្រោងផ្សេងៗមួយចំនួនទៀត នឹងអាចជួយបង្កើនលទ្ធភាពក្នុងការទប់ស្កាត់បទល្មើសទាំងនោះ និងអាចថែរក្សាព្រៃឈើដែលនៅសេសសល់ក្នុងតំបន់នេះឲ្យមាននិរន្តរភាពនៅពេលអនាគត។
លោកថា៖ «ខ្ញុំសង្ឃឹមថាការអនុវត្តគម្រោងនេះនឹងធ្វើឲ្យការគ្រប់គ្រងធនធានធម្មជាតិនៅតំបន់ព្រៃឡង់មានប្រសិទ្ធិភាពជាងមុន»។
បើតាមមន្ត្រីក្រសួងបរិស្ថាន តំបន់ទេសភាពព្រៃឡង់ និងតំបន់ការពារជុំវិញតំបន់ព្រៃឡង់លាតសន្ទឹងលើផ្ទៃដីជាង១លាន៤សែនហិកតា ក្នុងនោះមានដែនជម្រកសត្វព្រៃព្រៃឡង់ជាង៤៣ម៉ឺនហិកតា នៅខេត្តព្រះវិហារ ស្ទឹងត្រែង ក្រចេះ និងកំពង់ធំ។
ចំណែក សេចក្តីប្រកាសព័ត៌មានរបស់USAID ព្រៃឡង់បៃតង បានឲ្យដឹងថា ព្រៃឡង់ គឺជាព្រៃស្រោងវាលទំនាបដែលនៅសេសសល់ចុងក្រោយរបស់តំបន់អាស៊ីអាគ្នេហ៍ និងជាជម្រកសម្រាប់ប្រជាជនជាងមួយលាននាក់ រុក្ខជាតិ និងសត្វដែលរងការគំរាមកំហែងជាង ៤០ប្រភេទ។
ទោះបីជាព្រៃឡង់មានតួនាទីសំខាន់ក្នុងការប្រយុទ្ធនឹងការប្រែប្រួលអាកាសធាតុ ជួយសម្រួលដល់ការគ្រប់គ្រងទឹក និងផ្តល់ធនធានសំខាន់ៗដល់ប្រជាជនកម្ពុជាក៏ដោយ ប៉ុន្តែតំបន់នេះ កំពុងស្ថិតនៅក្រោមការគំរាមកំហែងពីការកាប់ឈើខុសច្បាប់ ការបរបាញ់និងការជួញដូរសត្វព្រៃ ការដណ្តើមដីធ្លី និងរងផលប៉ះពាល់ពីឥទ្ធិពលនៃការប្រែប្រួលអាកាសធាតុ៕
- Tags: USAID, ក្រសួងបរិស្ថាន, ព្រៃឡង់
