មន្ត្រីជាន់ខ្ពស់មួយរូបបាននិយាយថា កិច្ចព្រមព្រៀងពាណិជ្ជកម្មសេរីនៃភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ និងកិច្ចព្រមព្រៀងពាណិជ្ជកម្មសេរីទ្វេភាគី គឺជាកត្តាសំខាន់ដែលទាក់ទាញការវិនិយោគផ្ទាល់ពីបរទេសមកកម្ពុជា។
បន្ថែមលើកិច្ចព្រមព្រៀងពាណិជ្ជកម្មសេរី RCEP កម្ពុជាមានកិច្ចព្រមព្រៀងពាណិជ្ជកម្មសេរីទ្វេភាគីជាមួយចិន និងកូរ៉េខាងត្បូង ហើយ “កិច្ចព្រមព្រៀងទាំងនេះគឺជាកត្តាសម្រាប់ទាក់ទាញការវិនិយោគ
មកប្រទេសរបស់យើង” លោក វង្ស៊ី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បាននិយាយកាលពីថ្ងៃសុក្រនៅទីក្រុងភ្នំពេញ ខណៈដែលលោកនិយាយអំពីការគ្រប់គ្រងម៉ាក្រូសេដ្ឋកិច្ចរបស់ប្រទេសសម្រាប់ឆ្នាំនេះ។
កិច្ចព្រមព្រៀងRCEP គឺជាកិច្ចព្រមព្រៀងពាណិជ្ជកម្មរវាងប្រទេសសមាជិកអាស៊ានទាំង១០ និងដៃគូពាណិជ្ជកម្មធំៗចំនួន ៥ គឺ ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។
RCEP និងកិច្ចព្រមព្រៀងពាណិជ្ជកម្មសេរីកម្ពុជា-ចិនចូលជាធរមាននៅថ្ងៃទី១ ខែមករា ហើយកិច្ចព្រមព្រៀងរវាងកម្ពុជា និងកូរ៉េខាងត្បូងត្រូវបានគេរំពឹងថានឹងចូលជាធរមាននាពេលខាងមុខ។
លោក វង្ស៊ី វិស្សុត បាននិយាយថា កិច្ចព្រមព្រៀងទាំងនេះមានសារៈសំខាន់ណាស់ក្នុងការជំរុញកំណើនសេដ្ឋកិច្ចរបស់ប្រទេសកម្ពុជាក្នុងរយៈពេលវែង។
លោកបន្តថា សេដ្ឋកិច្ចកម្ពុជាត្រូវបានគេព្យាករថានឹងមានកំណើន ៥,៦ ភាគរយនៅឆ្នាំនេះ បើធៀបនឹងឆ្នាំមុនមាន ៣ ភាគរយ។ កំណើន ៦.៥ ភាគរយត្រូវបានរំពឹងនៅឆ្នាំក្រោយ និងរហូតដល់៧ ភាគរយនៅឆ្នាំ២០២៤ ។
សេដ្ឋកិច្ចត្រូវបានគាំទ្រជាចម្បងដោយការនាំចេញសម្លៀកបំពាក់ ស្បែកជើង និងទំនិញធ្វើដំណើរ ទេសចរណ៍ អចលនទ្រព្យ និងសំណង់ និងកសិកម្ម។ លោក វង្ស៊ី វិស្សុត បានថ្លែងថា ឧស្សាហកម្មទាំងនេះនឹងកើនឡើងនៅឆ្នាំនេះ។
លោកបានបន្តថា រដ្ឋាភិបាលបានរៀបចំកញ្ចប់ថវិការជាង ១ ពាន់លានដុល្លារសម្រាប់ឆ្នាំនេះ ដើម្បីជំរុញសេដ្ឋកិច្ច និងកាត់បន្ថយផលប៉ះពាល់ដែលបង្កឡើងដោយជំងឺរាតត្បាត។
លោកបានបន្តថា អត្រាចាក់វ៉ាក់សាំងខ្ពស់នៅកម្ពុជាបានអនុញ្ញាតឱ្យប្រទេសនេះអាចចាប់ផ្តើមសកម្មភាពសេដ្ឋកិច្ចសង្គមបានពេញលេញក្នុងគ្រប់វិស័យចាប់តាំងពីខែវិច្ឆិកាមក។
ក្រសួងសុខាភិបាលបាននិយាយថា មានប្រជាពលរដ្ឋ១៤,៣៩ លាននាក់ ឬ ៨៩,៩ ភាគរយនៃប្រជាជនកម្ពុជា ១៦ លាននាក់បានចាក់វ៉ាក់សាំងយ៉ាងតិចណាស់មួយដូស។
ក្រសួងបាននិយាយថា ក្នុងចំណោមពួកគេមាន ១៣.៨ លាននាក់ ឬ ៨៦.៣ ភាគរយបានចាក់វ៉ាក់សាំងពេញលេញ ចំណែកចំនួនប្រជាជន៦.២៣ លាននាក់ ឬ ៣៨.៩ ភាគរយបានចាក់វ៉ាក់សាំងលើកទី៣ឬ ដូសជម្រុញ ហើយមាន ៧៣៩.២០១នាក់ទៀត ឬស្មើ ៤.៦ ភាគរយបានចាក់វ៉ាក់សាំងលើកទី៤ ។
វ៉ាក់សាំងភាគច្រើនដែលប្រើក្នុងការចាក់វ៉ាក់សាំងរបស់ប្រទេសគឺ Sinovac និង Sinopharm របស់ប្រទេសចិន។ China Daily