ក្រសួងសាធារណការ និងដឹកជញ្ជូន បានចាប់ផ្តើមសាងសង់ និងកែលម្អផ្លូវជាតិលេខ៤ (NR4) ក្រោមហិរញ្ញប្បទាន ១១០លានដុល្លារពីធនាគារពិភពលោក ក្នុងគោលបំណងឆ្លើយតបកំណើនចរាចរណ៍នាពេលបច្ចុប្បន្ន។
ក្រសួងបានឲ្យដឹងក្នុងសេចក្តីប្រកាសព័ត៌មាន ដែលបានចេញផ្សាយកាលពីថ្ងៃចន្ទថា ការសាងសង់ និងកែលម្អផ្លូវជាតិលេខ ៤ ចាប់ផ្តើមពីឃុំបែកចាន ស្រុកអង្គស្នួល ខេត្តកណ្តាល ដល់ឃុំបិតត្រាំង ស្រុកព្រៃនប់ ខេត្តព្រះសីហនុ។
ក្រសួងបានបន្ថែមថា គម្រោងនេះបានចាប់ផ្តើមជាផ្លូវការនៅខែធ្នូ ឆ្នាំ២០២១ ហើយគ្រោងនឹងបញ្ចប់នៅខែធ្នូ ឆ្នាំ២០២៦។
យោងតាមក្រសួង ការសាងសង់ និងកែលម្អផ្លូវជាតិលេខ៤ រួមមានការពង្រីកផ្លូវបច្ចុប្បន្នពី ៧ ទៅ ១០ ម៉ែត្រ ការកែលម្អស្ពានបេតុងនិងលូបង្ហូរទឹក ចំនួន ៤៦ កន្លែង និងការសាងសង់ស្ពានថ្មីចំនួន ៨ ដើម្បីធានាចរាចរណ៍ និងទប់ទល់នឹងទឹកជំនន់។
ផ្លូវជាតិលេខ៤ មានប្រវែងជាង ២៣០គីឡូម៉ែត្រ តភ្ជាប់ពីរាជធានី ទៅកំពង់ផែទឹកជ្រៅក្នុងខេត្តព្រះសីហនុ។ ផ្លូវនេះត្រូវបានសាងសង់ក្នុងអំឡុងទសវត្សរ៍ឆ្នាំ១៩៥០ ជាមរតកនៃទំនាក់ទំនងរវាងប្រទេសកម្ពុជា និងសហរដ្ឋអាមេរិក។
បច្ចុប្បន្ន រដ្ឋាភិបាលកំពុងសាងសង់ផ្លូវល្បឿនលឿនភ្នំពេញ-ព្រះសីហនុប្រវែង ១៩០ គីឡូម៉ែត្រដំបូងគេបង្អស់ក្នុងប្រទេស។ ផ្លូវនេះគ្រោងនឹងដាក់ឱ្យប្រើប្រាស់បណ្តោះអាសន្នក្នុងខែកក្កដាខាងមុខនេះ។ ជា វណ្ណៈ – ទីភ្នាក់ងារសារព័ត៌មានកម្ពុជា AKP