នាយករដ្ឋមន្ត្រីកម្ពុជា និងឯកអគ្គរាជទូតជប៉ុនប្រចាំកម្ពុជា ពិភាក្សាគ្នាអំពីការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរលើវិស័យមួយចំនួន។
កិច្ចពិភាក្សានេះ ត្រូវបានធ្វើឡើងនៅវិមានសន្តិភាព កាលពីរសៀលម្សិលមិញ។
ក្នុងឱកាសនោះ ឯកអគ្គរាជទូតជប៉ុនប្រចាំកម្ពុជា លោក អឹអិណុ អាហ្សឹហ្ស៉ី (UENO Atsushi) បានរំលឹកឡើងវិញនូវការគាំទ្ររបស់ប្រទេសជប៉ុនចំពោះកិច្ចសហប្រតិបត្តិការជាមួយកម្ពុជាលើវិស័យវិនិយោគ ការតភ្ជាប់ បច្ចេកវិទ្យា ការអប់រំនិងបណ្តុះបណ្តាលវិជ្ជាជីវៈ សន្តិសុខនិងការពារជាតិ។ល។ ក្នុងវិស័យការពារជាតិ នាពេលថ្មីៗនេះ លោកបានសម្តែងនូវសេចក្តីរីករាយ ដោយកងកម្លាំងស្វ័យការពារជើងគោកជប៉ុន បានរៀបចំកិច្ចប្រជុំលើកដំបូងនៃក្រុមការងារកងទ័ពកម្ពុជា-ជប៉ុន។
ក្រៅពីនេះ លោកឯកអគ្គរាជទូតបានស្នើឱ្យមានសមយុទ្ធទ្វេភាគីរួមគ្នារវាងកងទ័ពជើងទឹកកម្ពុជា និងជប៉ុន ដើម្បីពង្រឹងទំនាក់ទំនងកាន់តែជិតស្និទ្ធរវាងប្រទេសទាំងពីរ សន្តិសុខ និងវិបុលភាពទាំងក្នុងតំបន់ និងពិភពលោក។
ជាការឆ្លើយតប ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្តែងការគាំទ្រចំពោះទិសដៅជំរុញកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ និងលើកទឹកចិត្តជប៉ុនឱ្យបង្កើនការវិនិយោគខ្នាតតូច និងមធ្យមនៅកម្ពុជាបន្ថែមទៀត។
នាយករដ្ឋមន្ត្រីកម្ពុជាបានស្នើឱ្យភាគីជប៉ុនពិនិត្យមើលលទ្ធភាពនៃការបង្កើតសួនឧស្សាហកម្មកម្ពុជា-ជប៉ុន និងជួយកម្ពុជាក្នុងការរៀបចំផែនការមេលើវិស័យភស្តុភារកម្ម ជាពិសេសការប្រែក្លាយកំពង់ផែស្វយ័តក្រុងព្រះសីហនុទៅជាច្រកទ្វារដ៏សំខាន់នៅក្នុងតំបន់។
ចំពោះវិស័យសន្តិសុខ និងការពារជាតិ នាយករដ្ឋមន្ត្រីបានស្វាគមន៍ចំពោះគំនិតក្នុងការជំរុញកិច្ចសហប្រតិបត្តិការឱ្យកាន់តែជិតស្និទ្ធ តាមរយៈការអនុវត្តសកម្មភាពជាក់ស្តែង ដូចជាកិច្ចប្រជុំរវាងក្រុមការងារនៃកងទ័ពនៃប្រទេសទាំងពីរ ដំណើរទស្សនកិច្ចរបស់កងកម្លាំងស្វ័យការពារជើងទឹកជប៉ុនមកកាន់កម្ពុជានៅឆ្នាំ២០២៤ ការរៀបចំសមយុទ្ធកងទ័ពជើងទឹករួមគ្នា តាមសំណើរបស់ភាគីជប៉ុន និងការបោសសម្អាតមីនជាដើម។ AKP-C.Nika