ទិវា​ដី​សើម​ពិភពលោក​ឆ្នាំ​២០២២ ប្រារព្ធ​ឡើង​នៅ​កម្ពុជា​ក្រោម​ប្រធានបទ​ការ​អភិរក្ស​ដី​សើម​សម្រាប់​មនុស្ស និង​ធម្មជាតិ។

សម្រាប់​កម្ពុជា​ឆ្នាំនេះ ក្រសួងបរិស្ថាន​នឹង​ប្រារព្ធ​ទិវា​ដីសើម​ពិភពលោក​នៅ​វិទ្យាល័យ​ ទៀ ចំរ៉ាត់ ក្រុង​ពោធិ៍សាត់ ខេត្តពោធិ៍សាត់។

ជីវិតប្រចាំថ្ងៃរបស់យើងមានទំនាក់ទំនងយ៉ាងជិតស្និទ្ធជាមួយតំបន់ដីសើម ដោយតំបន់ដីសើមផ្តល់សេវាប្រព័ន្ធអេកូឥតគិតថ្លៃ ដូចជាការផ្តល់ទឹកស្អាតសម្រាប់ការប្រើប្រាស់ប្រចាំថ្ងៃ និងប្រព័ន្ធធារាសាស្រ្ត ដើម្បីជួយកាត់បន្ថយទឹកជំនន់ និងគ្រោះមហន្តរាយ គ្រោះរាំងស្ងួត ការស្រូបយកកាបូន ការកម្រិតអាកាសធាតុ ប្រភពអាហារ ការលំហែបែបធម្មជាតិ និងការស្រាវជ្រាវ។

ដូច្នេះ យើង​គួរ​ឲ្យ​តម្លៃ​ក្នុង​ការ​ចូលរួម​អភិរក្ស ដាំ ស្ដារ និង​បង្ហាញ​ការ​ស្រឡាញ់​ដី​សើម។

អ្នកអាចប្រារព្ធទិវាដីសើមពិភពលោកនៅលើប្រព័ន្ធផ្សព្វផ្សាយសង្គមដោយគ្រាន់តែបង្ហោះរូបភាពនៃតំបន់ដីសើមដ៏ស្រស់ស្អាត ជីវចម្រុះ សហគមន៍មូលដ្ឋាន ឬសកម្មភាពទេសចរណ៍ធម្មជាតិនៅតំបន់ដីសើមដែលអ្នកបានទស្សនា និងប្រើប្រាស់។

យោងតាមរបាយការណ៍របស់ក្រសួងបរិស្ថាន គិតត្រឹមពេលនេះ មានទីតាំងរ៉ាមសារចំនួន ៥ នៅកម្ពុជា ដូចខាងក្រោម៖

១. តំបន់រ៉ាមសារកោះកាពិ

២. តំបន់រ៉ាមសារព្រែកទាល់

៣. តំបន់រ៉ាមសារស្ទឹងសែន

៤. តំបន់រ៉ាមសារបឹងទន្លេឆ្មា

៥.​ តំបន់​រ៉ាមសារស្ទឹង​ត្រែង​។

លើសពីនេះ កម្ពុជាក៏មានតំបន់អភិរក្ស ដែលជាតំបន់ដីសើមដែលមានសារៈសំខាន់សម្រាប់បរិស្ថាន ឬសង្គមដូចជា៖

-តំបន់អភិរក្សទេសភាពអន្លង់ព្រីង

-តំបន់អភិរក្សទេសភាព​បឹង​ព្រែក​លើ

-តំបន់អភិរក្សដីទំនាបបឹងទន្លេសាបខាងជើង

-តំបន់អភិរក្សទេសភាពអាងត្រពាំងថ្ម

-តំបន់ពហុប្រើប្រាស់ធារាសាស្ត្រ តាលី

-តំបន់ពហុប្រើប្រាស់បឹងស្នេហ៍

-តំបន់អភិរក្ស​បឹងក្តី

-តំបន់ពហុប្រើប្រាស់បឹងទន្លេសាប

– និងឧទ្យានជាតិសមុទ្រកោះរ៉ុង