លោកនាយករដ្ឋមន្ត្រី ហ៊ុន សែន បានប្រាប់លោកស្រី Louise Mushikiwabo អគ្គលេខាធិការអង្គការអន្តរជាតិនៃអង្គការឡាហ្វ្រង់កូហ្វូនី La Francophonie (OIF) ក្នុងកិច្ចប្រជុំកាលពីម្សិលមិញថា ប្រទេសកម្ពុជាកំពុងស្វែងរកទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគបន្ថែមទៀតជាមួយប្រទេសនិយាយភាសាបារាំង ។
លោក អ៊ាង សុផល្លែត ជំនួយការរបស់លោកនាយករដ្ឋមន្រ្តី ហ៊ុន សែន មានប្រសាសន៍ថា៖ « នៅក្នុងជំនួបនោះ សម្តេចនាយករដ្ឋមន្ត្រីបានមានប្រសាសន៍ថា សេដ្ឋកិច្ច ពាណិជ្ជកម្ម និងការវិនិយោគ គឺជាបេះដូងនៃកិច្ចសហប្រតិបត្តិការរវាងប្រទេសកម្ពុជា និងតំបន់ប្រទេសនិយាយភាសាបារាំអ(Francophonie)»។
លោក សុផល្លែត បានបន្ថែមថា៖ «លោកថាកម្ពុជា និងប្រទេស Francophonie មានសក្តានុពល ប៉ុន្តែមិនមានឱកាស ហើយគួរតែរួមគ្នាបង្កើតឱកាស ដើម្បីស្វែងរកសក្តានុពលណាមួយ ដើម្បីពង្រឹងកិច្ចសហប្រតិបត្តិការ»។
លោកបន្តថា លោកនាយករដ្ឋមន្ត្រីបានប្រាប់លោកស្រី Mushikiwabo ថា នៅពេលដែលទំនាក់ទំនងសេដ្ឋកិច្ច និងពាណិជ្ជកម្មមានភាពល្អ កិច្ចសហប្រតិបត្តិការនយោបាយនឹងកាន់តែជិតស្និទ្ធផងដែរ។
សម្តេច ហ៊ុន សែន ក្នុងនាមជាប្រធានអាស៊ាន ក៏បានកោតសរសើរចំពោះជោគជ័យនៃកិច្ចប្រជុំពាណិជ្ជកម្ម La Francophonie លើកដំបូងនៅអាស៊ីអាគ្នេយ៍ ដែលបានធ្វើឡើងកាលពីថ្ងៃចន្ទ ដោយមានប្រសាសន៍ថា នេះជាចំណុចស្នូលនៃកិច្ចសហប្រតិបត្តិការរវាងកម្ពុជា និងប្រទេសនិយាយភាសាបារាំងផ្សេងទៀត ក៏ដូចជារវាង អាស៊ាន និង OIF ។
លោកក៏បានជំរុញការអនុវត្តកិច្ចព្រមព្រៀងពាណិជ្ជកម្មសេរីអាស៊ាន (AFTA) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងច្រករបៀងទេសចរណ៍អាស៊ានជូនភ្ញៀវរបស់លោកផងដែរ។
លោកស្រី Mushikiwabo គឺជាអគ្គលេខាធិការទី៤ របស់ OIF ដែលកំពុងដឹកនាំគណៈប្រតិភូមកបំពេញទស្សនកិច្ចនៅកម្ពុជាចាប់ពីថ្ងៃសៅរ៍ដល់ថ្ងៃនេះ តបតាមការអញ្ជើញរបស់រដ្ឋមន្ត្រីក្រសួងការបរទេសលោក ប្រាក់ សុខុន។
កាលពីថ្ងៃច័ន្ទ លោកស្រី Mushikiwabo និងលោក ប្រាក់ សុខុន បានធ្វើជាអធិបតីក្នុងពិធីបើកបេសកកម្មសេដ្ឋកិច្ច និងពាណិជ្ជកម្មលើកដំបូងរបស់ La Francophonie នៅអាស៊ីអាគ្នេយ៍ និងពិធីចុះហត្ថលេខាលើឯកសារទាក់ទងនឹងកិច្ចសហប្រតិបត្តិការរវាងអង្គការពាណិជ្ជកម្មអាជីព និងសេដ្ឋកិច្ច។
នៅថ្ងៃដដែលនោះ លោកស្រី និងលោក សុខុន ក៏បានជួបពិភាក្សាគ្នាក្នុងគោលបំណងពង្រឹង និងពង្រីកកិច្ចសហប្រតិបត្តិការរវាងកម្ពុជា និង OIF ផងដែរ។
លោក សុខុនបានមានប្រសាសន៍ថា៖ « ពិតជាថ្ងៃដ៏រីករាយមួយ នៅពេលដែលខ្ញុំស្វាគមន៍យ៉ាងកក់ក្តៅចំពោះលោកស្រី Louise Mushikiwabo មកកាន់ប្រទេសកម្ពុជា សម្រាប់ដំណើរទស្សនកិច្ចផ្លូវការរបស់លោកស្រី ក្នុងអំឡុងពេលដែលយើងទើបតែបានឃើញបេសកកម្មសេដ្ឋកិច្ច និងពាណិជ្ជកម្មលើកដំបូងរបស់ La Francophonie នៅអាស៊ីអាគ្នេយ៍ និងពិធីចុះហត្ថលេខាលើឯកសារទាក់ទងនឹងកិច្ចសហប្រតិបត្តិការរវាងពាណិជ្ជកម្មអាជីព »។
លោកបន្តថា៖ « OIF បង្កប់នូវស្មារតីនៃពហុភាគីនិយម ដែលពិភពលោកត្រូវការឥឡូវនេះច្រើនជាងពេលណាទាំងអស់។ យើងសង្ឃឹមថាវានឹងមានភាពជោគជ័យជានិច្ចក្នុងពេលដែលមានរយៈពេលនៃភាពមិនប្រាកដប្រជានិងភាពប្រែប្រួល»។
OIF គឺជាអង្គការអន្តរជាតិតំណាងឱ្យប្រទេស និងតំបន់ដែលភាសាបារាំងជាភាសាទំនៀមទម្លាប់ ដែលចំនួនប្រជាជនភាគច្រើនជាអ្នកនិយាយភាសាបារាំង ឬជាកន្លែងដែលមានការពាក់ព័ន្ធគួរឱ្យកត់សម្គាល់ជាមួយវប្បធម៌បារាំង។ អង្គការនេះមានរដ្ឋសមាជិកចំនួន ៨៨ ក្នុងនោះរដ្ឋ និងរដ្ឋាភិបាលចំនួន ៥៤ ជាសមាជិកពេញសិទ្ធិ ៧ ជាសមាជិកសហការី និង ២៧ ជាអ្នកសង្កេតការណ៍។
ដោយសារប្រទេសកម្ពុជាជាអតីតអាណាព្យាបាលបារាំងពីឆ្នាំ១៨៦៣ ដល់ឆ្នាំ១៩៥៣ ព្រះរាជាណាចក្របានក្លាយជាសមាជិកនៃ OIF នៅឆ្នាំ ១៩៩៣៕
ប្រែសម្រួលដោយ៖ សុ ជាតា