ការផ្លាស់ប្តូរលិខិតប្តូរសារ និងឯកសារពាក់ព័ន្ធ ស្ដីពីការផ្ដល់ហិរញ្ញប្បទានឥតសំណងរបស់រដ្ឋាភិបាលជប៉ុន ដែលមានទឹកប្រាក់ចំនួន ១.៣៣៨ លានយ៉េន (ប្រមាណ ៩,៧ លានដុល្លារអាមេរិក) ត្រូវបានចុះហត្ថលេខា កាលពីម្សិលមិញ។
ការផ្លាស់ប្តូរលិខិតប្តូរសារនេះ ត្រូវបានចុះហត្ថលេខារវាងលោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងលោក អ៊ូអិណុ អាត់ស៊ូស៊ី (Ueno Atsushi) ឯកអគ្គរាជទូតជប៉ុនប្រចាំកម្ពុជា។
ជំនួយឥតសំណងនេះគឺសម្រាប់ការអនុវត្តគម្រោងសម្រាប់ការដំឡើងស្ថានីយវាស់វែងអចិន្ត្រៃយ៍ដោយផ្កាយរណបនៅទូទាំងប្រទេស។
គម្រោងខាងលើមានគោលបំណងពន្លឿនការអង្កេតវាស់វែងសុរិយោដី និងពង្រឹងសេវារដ្ឋបាលពាក់ព័ន្ធនឹងការចុះបញ្ជីដីធ្លី តាមរយៈការដំឡើងស្ថានីយវាស់វែងអចិន្ត្រៃយ៍ ដើម្បីរួមចំណែកលើកកម្ពស់គម្រោងហេដ្ឋារចនាសម្ព័ន្ធ។
ខណៈប្រទេសកម្ពុជាមានការអភិវឌ្ឍន៍ហេដ្ឋារចនាសម្ព័ន្ធ និងដីធ្លីយ៉ាងឆាប់រហ័ស ការដំឡើងស្ថានីយវាស់វែងអចិន្ត្រៃយ៍ដោយផ្កាយរណប(CORS) នៅទូទាំងប្រទេសកម្ពុជាពិតជាមានសារៈសំខាន់ណាស់។
ក្នុងនាមរាជរដ្ឋាភិបាល និងប្រជាជនកម្ពុជា លោក សុខ ចិន្តាសោភា បានថ្លែងអំណរគុណយ៉ាងស្មោះស្ម័គ្រចំពោះរដ្ឋាភិបាល និងប្រជាជនជប៉ុន ដែលបានបន្តពង្រីកជំនួយអភិវឌ្ឍន៍ផ្លូវការ (ODA) ដល់កម្ពុជា។
លោកបានបន្តថាជំនួយអភិវឌ្ឍន៍ផ្លូវការ (ODA) របស់ជប៉ុនគ្របដណ្តប់លើកិច្ចសហប្រតិបត្តិការជាច្រើនរួមទាំងការអភិវឌ្ឍហេដ្ឋារចនាសម្ព័ន្ធ វិស័យសុខាភិបាល អប់រំ ការផ្គត់ផ្គង់ទឹក និងការដោះមីន ជាដើម។
លោក សុខ ចិន្តាសោភា បានគូសបញ្ជាក់ថា នេះបានឆ្លុះបញ្ចាំងពីតួនាទីដ៏សំខាន់របស់ប្រទេសជប៉ុនក្នុងការរួមចំណែកដល់ការអភិវឌ្ឍន៍សេដ្ឋកិច្ចសង្គមរបស់កម្ពុជា។ AKP-ហេង បញ្ញា