ប្រជាជនកម្ពុជារហូតដល់ ៨៣ ភាគរយបានជ្រើសរើសសេវាថែទាំសុខភាពឯកជនដែលអាចនាំឱ្យពួកគេត្រូវចំណាយថវិការកាន់តែច្រើន។
យោងតាមរបាយការណ៍របស់ធនាគារពិភពលោកចំនួនប្រជាជនកម្ពុជាជ្រើសរើសសេវាថែទាំសុខភាពឯកជនបានកើនឡើងក្នុងរយៈពេលជាច្រើនឆ្នាំកន្លងមកនេះ។ ក្នុងឆ្នាំ២០០៩ ៧៦,៥ ភាគរយនៃចំនួនប្រជាជនបានជ្រើសរើសសេវាថែទាំសុខភាពឯកជន ហើយនៅឆ្នាំ២០២១ ចំនួននេះបានកើនឡើងដល់៨៣,៤ ភាគរយ។
យោងតាមក្រុមហ៊ុនស្រាវជ្រាវ Yuanta Securities (Cambodia) សេវាថែទាំសុខភាពឯកជនបានប្រមូលផ្តុំនៅតាមទីក្រុងធំៗ ជាពិសេសក្នុងរាជធានីភ្នំពេញ សៀមរាប ព្រះសីហនុ និងបាត់ដំបង។
ប៉ុន្តែការទទួលបានសេវាថែទាំសុខភាពឯកជនគឺមានតម្លៃថ្លៃ។ ក្រុមហុន Yuanta Securities បានអោយដឹងទៀតថា ការចំណាយលើការថែទាំសុខភាពគឺខ្ពស់រហូតដល់ ៥៧,៥ ភាគរយក្នុងឆ្នាំ២០១៩ ខ្ពស់ជាងគេទីពីរនៅអាស៊ាន បន្ទាប់ពីមីយ៉ាន់ម៉ា។ ធនាគារពិភពលោកបាននិយាយថា នៅឆ្នាំ២០២១ ការចំណាយលើការថែទាំសុខភាពក្នុងប្រទេសកម្ពុជាបានកើនឡើងដល់ ៦០ភាគរយ។
ក្រុមហ៊ុនធានារ៉ាប់រងទូទៅនៅកម្ពុជាបានលើកឡើងថាមធ្យោបាយដើម្បីដោះស្រាយបញ្ហានេះគឺការចុះឈ្មោះជាមួយបេឡាជាតិរបបសន្តិសុខសង្គម (ប.ស.ស.) របស់រដ្ឋាភិបាល។ លោក Joshua Wong Yeo Siongនាយកប្រតិបត្តិក្រុមហ៊ុន CB Insurance បានប្រាប់កាសែតខ្មែរថាមស៍ថា “រដ្ឋាភិបាលបាននិងកំពុងជួយបុគ្គលិក/កម្មករនៅក្នុងប្រទេសតាមរយៈ ប្រព័ន្ធគាំពារសង្គមប.ស.ស.” ។
ប.ស.ស.ត្រូវបានបើកដំណើរការនៅឆ្នាំ២០២២ បន្ថែមពីការផ្តល់ប្រាក់សោធននិវត្តន៍ ប/ស/ស ក៏មានគម្រោងធានារ៉ាប់រងសុខភាពសង្គមសម្រាប់កម្មករនៅកម្ពុជា ផងដែរ។ ពួកគេមានធានារ៉ាប់រងសុខភាព និងទទួលបានប្រាក់ឧបត្ថម្ភប្រចាំថ្ងៃសម្រាប់ការឈប់សម្រាកឈឺ គ្រោះថ្នាក់ការងារ និងលំហែមាតុភាព។ ប.ស.ស.ក៏រ៉ាប់រងនៅក្នុងករណីស្លាប់ ការដឹកជញ្ជូនសាកសព និងសេវាបញ្ជូនអ្នកជំងឺ ឬជនរងគ្រោះផងដែរ។
លោកបានបន្តថា “ប្រសិនបើក្រុមហ៊ុនកាន់តែច្រើនអាចមកចុះឈ្មោះ និងផ្តល់ការធានារ៉ាប់រងផ្នែកសុខភាព ជាពិសេសសម្រាប់ការចំណាយលើអ្នកជំងឺ វាពិតជារួមចំណែកជួយដល់ប្រជាពលរដ្ឋកម្ពុជា។ និយោជិតនឹងទទួលបានអត្ថប្រយោជន៍ ហើយក្រុមហ៊ុននឹងបានបំពេញទំនួលខុសត្រូវសង្គមរបស់ខ្លួន”។
ក្រុមហ៊ុនធានារ៉ាប់រងបានអោយដឹងទៀតថា កាលណាមានក្រុមហ៊ុនកាន់តែច្រើននៅក្នុងប្រទេសកម្ពុជាបានចុះឈ្មោះសហការអោយមានធានារ៉ាប់រង គឺជានិន្នាការវិជ្ជមានឆ្ពោះទៅរកការទទួលយកការធានារ៉ាប់រងសុខភាពកាន់តែទូលំទូលាយ ខណៈដែលក្រុមហ៊ុនទាំងនោះ មានស្តង់ដារអន្តរជាតិ ដែលពួកគេបានអនុវត្តនៅរាល់ពេលប្រតិបត្តិការទាំងអស់។ ដូច្នេះ ប្រសិនបើការផ្តល់សេវាធានារ៉ាប់រងសុខភាពជាផ្នែកនៃបទបញ្ជាផ្ទៃក្នុងស្តីពីអភិបាលកិច្ចសាជីវកម្ម នោះពួកគេក៏អាចអនុវត្តសម្រាប់ក្រុមហ៊ុននៅកម្ពុជាផងដែរ។
ធនាគារពិភពលោកនិយាយថា មូលហេតុដែលប្រជាជនកម្ពុជាភាគច្រើនជ្រើសរើសសេវាថែទាំសុខភាពឯកជនគឺដោយសារតែគុណភាពនៃការថែទាំសុខភាព និងមានភាពងាយស្រួលក្នុងការទទួលបាននៅសេវានេះ។ “ការមិនសូវប្រើប្រាស់សេវាថែទាំសុខភាពរដ្ឋគឺបណ្តាលមកពីចម្ងាយនៃការធ្វើដំណើរទៅកាន់មណ្ឌលសុខភាពដែលនៅជិតបំផុត ការផ្តល់សេវាឯកជនដ៏សម្បូបែបនិងរហ័ស ការយល់ឃើញអំពីគុណភាពសុខភាពសេវារដ្ឋក្នុងចំណោមប្រជាពលរដ្ឋ” ។
Related Posts
- April 11, 2023
- June 22, 2023
February 3, 2024- February 3, 2024
