រដ្ឋាភិបាលកម្ពុជាបានបង្កើតគណៈកម្មាធិការមួយដែលមានភារកិច្ចដោះស្រាយបញ្ហាដែលវិស័យឯកជនកំពុងប្រឈមនិងជំរុញការវិនិយោគ និងបរិយាកាសធុរកិច្ចក្នុងប្រទេស។
អនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី២ ខែមេសា បានឱ្យដឹងថា គណៈកម្មាធិការនេះនឹងត្រូវដឹកនាំដោយទេសរដ្ឋមន្ត្រីទទួលបន្ទុកបេសកកម្មពិសេស ដែលមានមន្ត្រីជាន់ខ្ពស់បួនរូបជាអនុប្រធាន និងមន្ត្រីចំនួន១២រូបទៀតជាសមាជិកមកពីក្រសួងស្ថាប័នពាក់ព័ន្ធ។
គណៈកម្មាធិការនេះមានភារកិច្ចដោះស្រាយបញ្ហាវិស័យឯកជន មានភារកិច្ចដឹកនាំ សម្របសម្រួល និងជំរុញការដោះស្រាយបញ្ហាប្រឈម ឬសំណូមពររបស់វិស័យឯកជនលើទិដ្ឋភាពច្បាប់ បច្ចេកទេស ឬ ផ្សេងទៀត ដែលស្ថិតក្នុងដែនសមត្ថកិច្ចចម្រុះត្រូវដោះស្រាយដោយ អន្តរក្រសួង និង/ឬ អន្តរស្ថាប័ន និង ដែលលើសពីដែនសមត្ថកិច្ច ឬ លទ្ធភាពសម្រេចរបស់គណៈកម្មាធិការគោលនយោបាយសេដ្ឋកិច្ច និង ហិរញ្ញវត្ថុ គណៈកម្មាធិការវិនិយោគកម្ពុជា ក្រុមការងារតាមវិស័យសម្រាប់ធ្វើជាដៃគូពិភាក្សាការងារជាមួយវិស័យឯកជន នៃវេទិការាជរដ្ឋាភិបាល-ផ្នែក ឯកជន និង យន្តការដទៃទៀត។
ប្រភពដដែលបានអោយដឹងទៀតថា “គណៈកម្មាធិការមានភារកិច្ចពិនិត្យ តាមដាន វាយតម្លៃ និង រាយការណ៍ជូននាយករដ្ឋមន្ត្រីចំពោះរាល់បញ្ហាប្រឈម និង សំណូមពរ ដើម្បីជំរុញការដោះស្រាយ និង/ឬ លើកកម្ពស់បរិយាកាសវិនិយោគ និង ធុរកិច្ច។ គណៈកម្មធិការនេះ មានភារកិច្ចដោះស្រាយបញ្ហាប្រឈម ឬ សំណូមពររបស់វិស័យឯកជន តាមករណីនីមួយៗ តាមការបញ្ជាផ្ទាល់ ពីសំណាក់នាយករដ្ឋមន្ត្រី បំពេញភារកិច្ចដទៃទៀត។
លោក លឹម ហេង អនុប្រធានសភាពាណិជ្ជកម្មកម្ពុជាបានកោតសរសើរចំពោះចំណាត់ការនេះ ដោយបានលើកឡើងថា គណៈកម្មាធិការដែលទើបបង្កើតថ្មីនឹងមានយន្តការបន្ថែមទៀតសម្រាប់ដោះស្រាយបញ្ហាដែលវិស័យឯកជនជួបប្រទះ។
លោកបានបន្ថែមថា “វិស័យឯកជនត្រូវការការយកចិត្តទុកដាក់បន្ថែមទៀតពីរដ្ឋាភិបាលដើម្បីដោះស្រាយបញ្ហាដែលធុរជន និងវិនិយោគិនជួបប្រទះ ហើយក៏ចូលរួមលើកកម្ពស់ភាពងាយស្រួលនៃការធ្វើអាជីវកម្មនៅក្នុងប្រទេសផងដែរ”។
បច្ចុប្បន្ន វិស័យឯកជនលើកបញ្ហា និងសំណូមពរដល់រដ្ឋាភិបាល តាមរយៈក្រុមការងារវិស័យឯកជនចំនួន១៦ ក្រោមវេទិការដ្ឋ-ឯកជន (G-PSF)។
G-PSF ត្រូវបានបង្កើតឡើងក្នុងឆ្នាំ១៩៩៧ ដើម្បីផ្តល់នូវវេទិកាដ៏មានប្រសិទ្ធភាពសម្រាប់ការពិគ្រោះយោបល់រវាងរដ្ឋាភិបាល និងវិស័យឯកជនលើបញ្ហាទាក់ទងនឹងការវិនិយោគចាប់ពីគោលនយោបាយរយៈពេលវែងរហូតដល់បញ្ហាប្រតិបត្តិការប្រចាំថ្ងៃ។
លោកបានបន្តថា៖ «គណៈកម្មាធិការថ្មីរំពឹងថានឹងដោះស្រាយបញ្ហាដែលវិស័យឯកជនកំពុងប្រឈមបានភ្លាមៗ»។
ក្រោមគោលនយោបាយអភិវឌ្ឍន៍ឧស្សាហកម្ម (IDP) រដ្ឋាភិបាលកម្ពុជាមានគោលបំណងទាក់ទាញការវិនិយោគពីបរទេសប្រកបដោយគុណភាព និងធ្វើឱ្យប្រសើរឡើងនូវការផ្ទេរបច្ចេកវិទ្យា អភិវឌ្ឍ និងធ្វើទំនើបកម្មសហគ្រាសធុនតូច និងមធ្យម និងកែលម្អការសម្របសម្រួលគោលនយោបាយ។
រដ្ឋាភិបាលក៏បានផ្តល់អាទិភាពដល់វិធានការលើកកម្ពស់ភាពងាយស្រួលនៃការធ្វើអាជីវកម្មនៅក្នុងស្រុក តាមរយៈឌីជីថលូបនីយកម្ម និងថែរក្សាឧស្សាហកម្មដែលមានតម្លៃខ្ពស់ដែលជួយលើកកម្ពស់អាជីវកម្មដែលផ្តល់អត្ថប្រយោជន៍ដល់សង្គម។