យោងតាមរបាយការណ៍ចេញផ្សាយដោយក្រសួងកសិកម្ម រុក្ខាប្រមាញ់ និងនេសាទកម្ពុជា កាលពីថ្ងៃព្រហស្បតិ៍ បានឱ្យដឹងថា ប្រទេសចិនគឺជាអ្នកនាំចូលដ៏សំខាន់នៃកសិផលរបស់កម្ពុជាក្នុងឆ្នាំ២០២២។
របាយការណ៍បានឲ្យដឹងថា ប្រទេសចិនបានទិញកសិផលកម្ពុជាមួយចំនួនជាពិសេសអង្ករ ចេកលឿង ស្វាយ ដំឡូងមី គ្រាប់ស្វាយចន្ទី ពោត ផ្លែមាន ម្រេច និងជាច្រើនទៀត។
របាយការណ៍បានបន្ថែមថា កសិផលកម្ពុជាចំនួន ៦៨៩,៧០២ តោន ត្រូវបានដឹកជញ្ជូនទៅកាន់ប្រទេសចិនក្នុងអំឡុងខែមករាដល់ខែវិច្ឆិកាក្នុងឆ្នាំ២០២២។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកម្ពុជា លោក ឌិត ទីណា មានប្រសាសន៍ថា ប្រទេសចិននៅតែមានសក្ដានុពលក្នុងការស្រូបយកកសិផលកម្ពុជាបន្ថែមទៀត ដោយលោកថាប្រទេសទាំងពីរមិនទាន់បានប្រើប្រាស់សក្តានុពលអតិបរមាក្នុងវិស័យនេះនៅឡើយទេ។
លោកបានប្រាប់សារព័ត៌មានស៊ីនហួក្នុងបទសម្ភាសន៍នាពេលថ្មីៗនេះថា៖ «កម្ពុជានិងចិនមានកិច្ចសហប្រតិបត្តិការខាងកសិកម្មរឹងមាំ ហើយយើងបាននាំចេញអង្ករ ស្វាយ ចេក និងថ្មីៗនេះ គឺផ្លែមាន ទៅប្រទេសចិន»។
លោកបានបន្ថែមថា “ខ្ញុំចង់លើកទឹកចិត្តភាគីពាក់ព័ន្ធទាំងអស់នៃប្រទេសទាំងពីរឱ្យជំរុញកិច្ចសហប្រតិបត្តិការឱ្យកាន់តែជិតស្និទ្ធបន្ថែមទៀត ដើម្បីស្វែងរកមធ្យោបាយថ្មី កាន់តែប្រសើរ និងមានប្រសិទ្ធភាពបន្ថែមទៀត ដើម្បីឆ្លើយតបទៅនឹងសក្តានុពលដែលយើងមាន” ។
លោក ទីណា បានមានប្រសាសន៍ថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) ដែលបានចូលជាធរមានកាលពីខែមករាឆ្នាំមុន បានបញ្ចូលកម្លាំងរុញច្រានថ្មីទៅក្នុងការអភិវឌ្ឍន៍វិស័យកសិកម្មរបស់កម្ពុជា។
លោកបានមានប្រសាសន៍ថា “RCEP និង CCFTA គឺជាកិច្ចព្រមព្រៀងពាណិជ្ជកម្មសេរីដែលបើកទីផ្សារទៅវិញទៅមកនៅក្នុងប្រទេសដែលចូលរួមទាំងអស់ ដើម្បីផ្តល់ជម្រើសដល់កសិករក្នុងការនាំចេញផលិតផលកសិកម្មរបស់ពួកគេទៅកាន់ប្រទេសផ្សេងៗ” ។ កិច្ចព្រមព្រៀងពាណិជ្ជកម្មសេរីទាំងពីរ នឹងរួមចំណែកមិនត្រឹមតែដល់កំណើននៃវិស័យកសិកម្មប៉ុណ្ណោះទេ ប៉ុន្តែថែមទាំងដល់សុខុមាលភាព និងវិបុលភាពរបស់កសិករផងដែរ។
កសិកម្មគឺជាសសរស្តម្ភមួយក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចកម្ពុជា។ វិស័យនេះបានរួមចំណែក ២៤.៤ ភាគរយដល់ផលិតផលក្នុងស្រុកសរុប (GDP) របស់ប្រទេសក្នុងឆ្នាំ២០២១៕ Xinhua