គម្រោង USAID ព្រៃឡង់បៃតង កំពុងស្រាវជ្រាវ និងធ្វើជំរឿនចំនួនសត្វព្រៃដែលមាននៅក្នុងដែនជម្រកសត្វព្រៃព្រៃឡង់ដោយប្រើវិធីសាស្រ្តដើរតាមបន្ទាត់ត្រង់។ ការស្រាវជ្រាវជីវចម្រុះ គឺជាសកម្មភាពសំខាន់សម្រាប់គម្រោងរេដបូក (redd+) ដែលជាកម្មវិធីជាតិកាត់បន្ថយការបំភាយឧស័្មនផ្ទះកញ្ចក់ពីការបាត់បង់និងរេចរឹលនៃព្រៃឈើ។
យោងតាមការចេញផ្សាយដោយគម្រោង USAID ព្រៃឡង់បៃតង កាលពីថ្ងៃអង្គារ បានឱ្យដឹងថា ការតាមដានជីវចម្រុះសម្រាប់គម្រោងរេដបូកនៅតំបន់ព្រៃឡង់មានសមាសភាគស្នូលចំនួនពីរ ដែលនឹងធ្វើឡើងរៀងរាល់បីទៅបួនឆ្នាំម្តង។ វារួមមានការរាប់ចំនួនសត្វព្រៃដោយការដាក់កាមេរ៉ាស្វ័យប្រវត្តិ និងរាប់ដោយប្រើវិធីសាស្រ្តការ
កត់ទិន្នន័យតាមរយៈបន្ទាត់ត្រង់។
គម្រោង USAID ព្រៃឡង់បៃតង បន្តថា ការរាប់ដោយការដាក់កាមេរ៉ាស្វ័យប្រវត្តិជាលើកដំបូងនៅក្នុងព្រៃឡង់ត្រូវបានបញ្ចប់នៅឆ្នាំ២០២១ ហើយលទ្ធផលនឹងត្រូវបានបោះពុម្ពផ្សាយនៅចុងឆ្នាំ២០២២។ វិធីសាស្រ្តទាំងពីរនេះត្រូវបានចាត់ទុកថា ជាវិធីល្អបំផុតសម្រាប់ការតាមដានជីវចម្រុះ ដែលសូចនាករប្រភេទសត្វសំខាន់ៗដែលទ្រទ្រង់សុខភាពអេកូឡូស៊ី
អាចត្រូវបានគេវាយតម្លៃ និងតាមដានក្នុងរយៈពេលវែង។
ខ្មែរថាមស៍មិនអាចសុំការអត្ថាធិប្បាយពាក់ព័ន្ធនឹងករណីនេះពីលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ និងលោក នេត្រ ភក្ត្រា អ្នកនាំពាក្យក្រសួងបរិស្ថាន បានទេពីម្សិលមិញ។
យ៉ាងណាគម្រោង USAID ព្រៃឡង់បៃតង និយាយថា ដើម្បីសម្រេចបានវិធីសាស្រ្តបន្ទាត់ត្រង់ ត្រូវមានការបណ្តុះបណ្តាលបុគ្គលិក ការបង្កើតក្រឡាចត្រង្គ និងការចុះផ្ទាល់ទៅក្នុងព្រៃ។ ឥឡូវនេះការរាប់ចំនួនសត្វព្រៃស្ថិតក្នុងដំណាក់កាលបង្កើតក្រឡាចត្រង្គ បន្ទាប់ពីបានផ្តល់ការបណ្តុះបណ្តាលដល់ក្រុមស្រាវជ្រាវ។
ប្រភពបានបន្ថែមថា៖ «ក្រុមស្រាវជ្រាវនេះរួមមានអ្នកស្រាវជ្រាវផ្នែកជីវចម្រុះចំនួន១២នាក់ មន្ត្រីឧទ្យានុរក្សរបស់មន្ទីរបរិស្ថានខេត្តចំនួន៨នាក់ជុំវិញព្រៃឡង់ ព្រមទាំងបុគ្គលិកគម្រោង USAID ព្រៃឡង់បៃតងចំនួន២នាក់»។
គម្រោង USAID ព្រៃឡង់បៃតង បន្ថែមទៀតថា៖ «កម្មវិធីកុំព្យូទ័រត្រូវបានប្រើដើម្បីបង្កើតក្រឡាចត្រង្គចំនួន៧៤ ដែលក្រឡានីមួយៗមានផ្ទៃដីមួយគីឡូម៉ែត្រការ៉េ មានទីតាំងកំណត់ដោយចៃដន្យនៅពាសពេញព្រៃឡង់។ បន្ទាប់ពីការគូសផែនទីប្លង់ក្រឡាចត្រង្គ ក្រុមការងារស្រាវជ្រាវបាន និងកំពុងចូលទៅក្នុងព្រៃដើម្បីសម្គាល់ក្រឡាចត្រង្គនីមួយៗ»។
ជាមួយនឹងគ្នានេះដែរ គម្រោង USAID ព្រៃឡង់បៃតង បានផ្តល់ជូនអ្នកស្រាវជ្រាវសហគមន៍នូវឧបករណ៍ចាំបាច់សម្រាប់ការងារនេះ រួមមាន GPS កាបូបស្ពាយមិនជ្រាបទឹក ស្បែកជើងកវែង អង្រឹង ពិលពាក់ក្បាល អាវភ្លៀង
ចង្រ្កានហ្គាសតូច ឆ្នាំង និងសម្ភារៈសង្គ្រោះបឋម។ ការចុះកំណត់ក្រឡាចត្រង្គនឹងធ្វើឡើងចាប់ពីខែតុលាដល់ខែធ្នូ ឆ្នាំ
២០២២ ហើយការកត់ត្រាទិន្នន័យនឹងចាប់ផ្តើមនៅខែមករារហូតដល់ខែឧសភាឆ្នាំ២០២៣។
រដ្ឋាភិបាលកម្ពុជានៅថ្ងៃទី៩ ខែតុលា ឆ្នាំ២០១៦ បានសម្រេចចេញអនុក្រឹត្យ បង្កើតដែនជម្រកសត្វព្រៃ ព្រៃឡង់ក្នុងទំហំផ្ទៃដី ៤៣១ ៦៨៣ហិកតា ដែលស្ថិតនៅក្នុងខេត្តស្ទឹងត្រែង កំពង់ធំ ក្រចេះ និងខេត្តព្រះវិហារ។ ការបង្កើតដែនជម្រកសត្វព្រៃព្រៃឡង់ ដើម្បីធានាឱ្យមានការថែទាំទីជម្រកសត្វព្រៃ និងប្រព័ន្ធអេកូឡូស៊ី ព្រមទាំងធានាឱ្យមានការបំពេញលក្ខខណ្ឌចាំបាច់សម្រាប់ប្រភេទណាមួយនៃសត្វ រុក្ខជាតិ និងជីវៈចម្រុះ។
បន្ថែមពីនេះ គឺដើម្បីលើកកម្ពស់ការចូលរួមរបស់សហគមន៍មូលដ្ឋាន ក៏ដូចជាសាធារណជនក្នុងការរួមចំណែកដល់ការគ្រប់គ្រង ការការពារ និងការអភិរក្សជីវៈចម្រុះនិងធនធានធម្មជាតិក្នុងតំបន់៕
Related Posts
- December 13, 2021
July 19, 2022
July 28, 2022- November 24, 2021
