ផ្លូវត្រីភូមិស្លែង ដែលជាផ្លូវត្រីដែលគាំទ្រដោយប្រទេសអូស្ត្រាលីនៅស្រុកក្រឡាញ់ ខេត្តសៀមរាប ត្រូវបានបើកដំណើរការជាផ្លូវការកាលពីម្សិលមិញ ដែលរួមចំណែកដល់ការស្តារការបំលាស់ទីរបស់ត្រី និងការតភ្ជាប់ផ្លូវទឹកដែលមានភាពងាយស្រួលឡើងវិញរវាងបឹងទន្លេសាប និងសហគមន៍មូលដ្ឋាន។
ពិធីបើកនេះប្រព្រឹត្តទៅក្រោមអធិបតីភាព លោក ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកអគ្គរដ្ឋទូតអូស្ត្រាលីប្រចាំកម្ពុជា លោក Justin Whyatt ដោយមានការចូលរួមពីមន្ត្រីរដ្ឋាភិបាល និងអ្នកភូមិ។
យោងតាមសេចក្តីប្រកាសព័ត៌មានរបស់ស្ថានទូតអូស្ត្រាលីប្រចាំនៅទីក្រុងភ្នំពេញនៅព្រឹកនេះបានឱ្យដឹងថា ផ្លូវត្រីភូមិស្លែង នឹងផ្តល់អត្ថប្រយោជន៍ដល់បរិស្ថាន និងសុខុមាលភាពសង្គម និងសេដ្ឋកិច្ចរបស់សហគមន៍មូលដ្ឋានដែលពឹងផ្អែកលើត្រីជាអាហារ និងប្រាក់ចំណូល។
ស្ថានទូតបានបន្ថែមថា ផ្លូវត្រីនេះគឺជាដំណោះស្រាយដ៏សំខាន់មួយចំពោះបញ្ហាប្រឈមខាងជលផលរបស់កម្ពុជា ខណៈការអភិវឌ្ឍន៍ថាមពលវារីអគ្គិសនី និងប្រព័ន្ធធារាសាស្រ្ត មានសារៈសំខាន់សម្រាប់កំណើនសេដ្ឋកិច្ច ប៉ុន្តែវាក៏អាចធ្វើឱ្យខូចផ្លូវទឹក និងរំខានដល់ការបំលាស់ទីរបស់ត្រីផងដែរ។ AKP-ផល សុផានិត