ស្ថានទូតអូស្ត្រាលីនៅទីក្រុងភ្នំពេញបានអោយដឹងថា រដ្ឋាភិបាលអូស្ត្រាលីបានគាំទ្រការផ្តល់សេវាសាធារណៈប្រកបដោយបរិយាបន្ន និងសមធម៌នៅក្នុងប្រទេសកម្ពុជា។
កាលពីថ្ងៃទី៤ ខែធ្នូ ឆ្នាំ២០២៣ ប្រភពដដែលបានចង្អុលបង្ហាញថា ស្ថានទូតអូស្ត្រាលី ធនាគារពិភពលោក គណៈកម្មាធិការជាតិសម្រាប់លេខាធិការដ្ឋានអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (NCDDS) និងអង្គការទស្សនៈពិភពលោកអន្តរជាតិនៅកម្ពុជា (WVI-C) បានដាក់ចេញដំណាក់កាលបន្ទាប់នៃការអនុវត្តគម្រោងគណនេយ្យភាពសង្គម (ISAF) ។
អូស្ត្រាលីកំពុងផ្តល់ជំនួយបន្ថែមចំនួន១៥ លានដុល្លារអូស្រ្តាលី សម្រាប់អនុវត្ត ISAF II ដើម្បីកែលម្អការអនុវត្តរបស់អ្នកផ្តល់សេវាសាធារណៈតាមរយៈការពង្រឹងតម្លាភាព ក៏ដូចជាការចូលរួមរបស់ប្រជាពលរដ្ឋ និងសកម្មភាពឆ្លើយតបស្របតាមកម្មវិធីជាតិរបស់រាជរដ្ឋាភិបាលកម្ពុជាស្តីពីការអភិវឌ្ឍតាមបែបប្រជាធិបតេយ្យថ្នាក់ក្រោមជាតិដំណាក់កាលទី២ (សម្រាប់ឆ្នាំ២០២១-២០៣០) ។
ស្ថានទូតបានគូសបញ្ជាក់ថា ការផ្តល់ជំនួយបន្ថែមនឹងធ្វើឲ្យប្រសើរឡើងនូវសេវាសាធារណៈនៅតាមឃុំចំនួន ១០៤៣ សាលាបឋមសិក្សាចំនួន ៤៦៣៣ និងមណ្ឌលសុខភាពចំនួន ៨២៦ ដែលនឹងផ្តល់អត្ថប្រយោជន៍ដល់ប្រជាជនកម្ពុជាជាង៥ លាននាក់នៅឆ្នាំ២០២៥។
ISAF II នឹងបន្តបង្កើនទំនាក់ទំនងរវាងអ្នកផ្តល់សេវា និងអ្នកប្រើប្រាស់សេវាកម្ម ដើម្បីកែលម្អការផ្តល់សេវា និងបង្កភាពកាន់តែងាយស្រួលដល់មនុស្សគ្រប់គ្នា។
ស្ថានទូតបានបន្ថែមថា “យើងសង្ឃឹមថាដំណើរការនេះនឹងបង្កើតទំនុកចិត្ត និងភាពជាដៃគូនៅថ្នាក់ក្រោមជាតិ”។ AKP-Phal Sophanith