នៅថ្ងៃទី៣០ ខែតុលា វេលាម៉ោង ៥:៤០ ល្ងាច លោកស្រី KAMIKAWA Yoko រដ្ឋមន្ត្រីការបរទេសជប៉ុន បានជួបពិភាក្សាការងារតាមទូរស័ព្ទជាមួយឯកឧត្តម សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជាអស់រយៈពេលប្រហែល២៥នាទី។
ថ្នាក់ដឹកនាំទាំងពីរបានអបអរសាទរគ្នាទៅវិញទៅមកចំពោះការចូលកាន់តំណែងរបស់ខ្លួន។ ឯកឧត្តម សុខ ចិន្តាសោភា បានថ្លែងអំណរគុណចំពោះការរួមចំណែកដ៏ធំធេងរបស់ប្រទេសជប៉ុនចាប់តាំងពីឆ្នាំ ១៩៩២ មកក្នុងការអភិវឌ្ឍប្រទេសកម្ពុជា ហើយឯកឧត្តមបានលើកឡើងថា កម្ពុជាមិនដែលភ្លេចជំនួយរបស់ជប៉ុនចំពោះដំណើរការសន្តិភាព ការស្តារ និងអភិវឌ្ឍសេដ្ឋកិច្ចរបស់កម្ពុជានោះទេ។
លោកស្រីបានបង្ហាញពីឆន្ទះក្នុងការធ្វើការជាមួយឯកឧត្តមឧបនាយករដ្ឋមន្ត្រី សុខ ចិន្តាសោភា ដើម្បីពង្រឹង “ភាពជាដៃគូយុទ្ធសាស្ត្រគ្រប់ជ្រុងជ្រោយ” រវាងប្រទេសជប៉ុន និងកម្ពុជា និងដើម្បីរក្សា និងពង្រឹងសណ្តាប់ធ្នាប់អន្តរជាតិដោយសេរី និងបើកចំហដោយផ្អែកលើនីតិរដ្ឋ។ រដ្ឋមន្ត្រីទាំងពីរបានបញ្ជាក់ថា ពួកគេនឹងធ្វើការរួមគ្នាឆ្ពោះទៅរកការពង្រឹងទំនាក់ទំនងទ្វេភាគី។
លោកស្រីក៏បានស្វាគមន៍ចំពោះទំនាក់ទំនងកម្រិតខ្ពស់យ៉ាងសកម្មរវាងជប៉ុន និងកម្ពុជា ហើយបានបង្ហាញពីចេតនារបស់ប្រទេសជប៉ុនក្នុងការជំរុញកិច្ចសហប្រតិបត្តិការផ្នែកសន្តិសុខតាមរយៈមធ្យោបាយផ្សេងៗ រួមទាំងដំណើរទស្សនកិច្ចរបស់កងកម្លាំងស្វ័យការពារដែនសមុទ្រជប៉ុនទៅកាន់មូលដ្ឋានទ័ពជើងទឹករាម។
លើសពីនេះ សម្រាប់វិស័យសេដ្ឋកិច្ច លោកស្រីបានស្នើកម្ពុជា ដោះស្រាយបញ្ហាប្រឈមនានាដែលក្រុមហ៊ុនជប៉ុនដែលកំពុងជួបប្រទះក្នុងការប្រតិបត្តិការរបស់ខ្លួននៅប្រទេសកម្ពុជាដើម្បីទាក់ទាញការវិនិយោគបន្ថែមទៀត។ លោកស្រីក៏បានបង្ហាញពីបំណងរបស់ប្រទេសជប៉ុនក្នុងការជំរុញកិច្ចសហប្រតិបត្តិការលើវិស័យឌីជីថលនីយកម្ម ការតភ្ជាប់ និងអភិបាលកិច្ចសម្រាប់ការអភិវឌ្ឍសេដ្ឋកិច្ច និងសង្គមកម្ពុជា។
លោកស្រីបានបញ្ជាក់ទៀតថា ក្នុងការកសាងសង្គមប្រជាធិបតេយ្យប្រកបដោយសុខភាពល្អ ចាំបាច់ត្រូវបង្កើតបរិយាកាសមួយដែលប្រជាពលរដ្ឋអាចបញ្ចេញមតិ ហើយជប៉ុននឹងបន្តគាំទ្រដល់ការអភិវឌ្ឍលទ្ធិប្រជាធិបតេយ្យរបស់កម្ពុជា។
ជាកិច្ចឆ្លើយតប ឯកឧត្តម សុខ ចិន្តាសោភា បានថ្លែងអំណរគុណចំពោះការគាំទ្ររបស់ប្រទេសជប៉ុន ក្នុងការបង្កើតក្រមរដ្ឋប្បវេណីរបស់កម្ពុជា និងបានបញ្ជាក់ថា កម្ពុជាចង់ពង្រឹងកិច្ចសហប្រតិបត្តិការក្នុងវិស័យអភិបាលកិច្ច។
ឯកឧត្តមបានបន្តទៀតកម្ពុជានឹងជួយសម្រួលដល់ការវិនិយោគរបស់ជប៉ុននៅកម្ពុជាបន្ថែមទៀត ដោយសហការជាមួយភាគីពាក់ព័ន្ធរបស់ជប៉ុន។ រដ្ឋមន្ត្រីទាំងពីរបានបញ្ជាក់ថា ពួកគេនឹងធ្វើការយ៉ាងជិតស្និទ្ធ ដើម្បីលើកកម្ពស់ការតភ្ជាប់ក្នុងតំបន់។
រដ្ឋមន្ត្រីទាំងពីរបានឯកភាពគ្នាថា ប្រទេសទាំងពីរនឹងបន្តធ្វើការរួមគ្នាឆ្ពោះទៅរកកិច្ចប្រជុំកំពូលរំលឹកខួបលើកទី៥០នៃមិត្តភាព និងកិច្ចសហប្រតិបត្តិការអាស៊ាន-ជប៉ុន នៅខែធ្នូខាងមុខ។
លោកស្រីក៏បានលើកឡើងពីសារៈសំខាន់នៃការលើកកម្ពស់ស្ត្រី សន្តិភាព និងសន្តិសុខ។ ជាការឆ្លើយតប ឯកឧត្តម សុខ ចិន្តាសោភា បានបញ្ជាក់ថា កម្ពុជាបានក្លាយជាប្រទេសដែលចួលរួមថែរក្សាសន្តិភាព ហើយស្ត្រីជាច្រើនបានដើរតួនាទីយ៉ាងសកម្មនៅក្នុងសកម្មភាពនេះ។ បន្ថែមពីលើនេះ ឯកឧត្តមសុខ ចិន្តាសោភា បានកត់សម្គាល់ថា ជប៉ុន និងកម្ពុជា បាននឹងកំពុងសហការគ្នាក្នុងការដោះមីននៅក្នុងប្រទេសអ៊ុយក្រែន។ រដ្ឋមន្ត្រីទាំងពីរបានចែករំលែកទស្សនៈថា ប្រទេសទាំងពីរនឹងបន្តធ្វើការជាមួយគ្នាអោយកាន់តែជិតស្និទ្ធបន្ថែមទៀតក្នុងវិស័យផ្សេងៗ។ Mofa.go.jp