យោងតាមរបាយការណ៍របស់សហព័ន្ធស្រូវអង្ករកម្ពុជា ក្នុងរយៈពេលបីខែដំបូងនៃឆ្នាំនេះ កម្ពុជាបាននាំចេញអង្ករចំនួន១៦៦,៤៥១ តោនទៅកាន់ទីផ្សារអន្តរជាតិ ថយចុះបន្តិចពីចំនួន ១៧៦,៥៨១ តោនក្នុងរយៈពេលដូចគ្នាកាលពីឆ្នាំមុន។
កម្ពុជារកចំណូលបានជិត ១២៣.៦ លានដុល្លារពីការនាំចេញអង្ករក្នុងអំឡុងខែមករាដល់ខែមីនា ធ្លាក់ចុះ១,៩ ភាគរយពី១២៦លានដុល្លារធៀបនឹងឆ្នាំមុន។
អង្ករដែលបាននាំចេញរួមមាន អង្ករក្រអូប អង្ករសគ្រាប់វែង អង្ករចំហុយ និងអង្ករសរីរាង្គ ដោយអង្ករក្រអូបមានចំនួន៨១ ភាគរយនៃការនាំចេញអង្ករសរុប។
របាយការណ៍នេះបានឱ្យដឹងទៀតថា អង្ករកម្ពុជាត្រូវបាននាំចេញទៅកាន់ប្រទេស និងតំបន់ចំនួន៥៦ ជុំវិញពិភពលោកពីក្រុមហ៊ុននាំចេញចំនួន៤៦ ដោយបន្ថែមថាប្រទេសទិញអង្ករសំខាន់ៗរបស់កម្ពុជារួមមានសហភាពអឺរ៉ុប ប្រទេសចិន និងប្រទេសសមាជិកអាស៊ាន។
របាយការណ៍បានបន្តថា ប្រទេសចិននៅតែជាអ្នកទិញអង្ករនាំមុខគេរបស់កម្ពុជា ដោយបានទិញអង្ករចំនួន ៤៣.០៣៩ តោន ឬ ២៥,៨ ភាគរយនៃការនាំចេញអង្ករសរុបរបស់កម្ពុជានៅក្នុងត្រីមាសទីមួយ។
ទន្ទឹមនឹងនេះ កម្ពុជារកចំណូលបានប្រមាណ ៦០០ លានដុល្លារ ពីការនាំចេញស្រូវប្រមាណជាង ២,២២ លានតោន ក្នុងរយៈពេលបីខែ។
ក្នុងឆ្នាំ២០២៣ កម្ពុជាបាននាំចេញអង្ករជាង៦៥៦.០០០តោន ដោយរកចំណូលបាន៤៦៦លានដុល្លារ កើនឡើង៣%ក្នុងបរិមាណនិង១៣%ជាតម្លៃធៀបនឹងឆ្នាំ២០២២។
សហព័ន្ធស្រូវអង្ករកម្ពុជាបានកំណត់គោលដៅក្នុងការនាំចេញអង្ករឱ្យបានយ៉ាងហោចណាស់មួយលានតោននៅឆ្នាំ២០២៥។